სომალიში მოხდარ აფეთქებას 3 სომალელი ჯარისკაცის სიცოცხლე ემსხვერპლა, 1 ამერიკელი ოფიცერი კი მძიმედ დაიჭრა, - ამის შესახებ ინფორმაციას Reuters-ი ავრცელებს.
სააგენტოს ცნობით, ავტომობილში დამონტაჟებული ბომბი ქვეყნის სამხრეთ ნაწილში, სომალის სპეციალური ძალების ბაზის გარეთ აფეთქდა.
მომხდარზე პასუხისმგებლობა „ალ-ქაიდასთან“ დაკავშირებულმა დაჯგუფება „ალ-შაბააბმა“ აიღო. მათი ინფორმაციით, თავდასხმის შედეგად 4 ამერიკელი ოფიცერი და 16 სომალელი ჯარისკაცი მოკლეს.
„4 ამერიკელი ოფიცერი და 16 სომალელი ჯარისკაცი მოვკალით. ასევე 12 სომალელი ჯარისკაცი დავჭერით და 3 ამერიკული ჯავშანმანქანა გავანადგურეთ,“- აღნიშნულია „ალ-შაბააბის“ ოფიციალური წარმომადგენლის მიერ გავრცელებულ განცხადებაში.
ცნობისათვის, „ალ-შაბააბი“ სომალის ცენტრალური მთავრობის წინააღმდეგ ძალაუფლების ხელში ჩაგდების მიზნით 2008 წლიდან იბრძვის.