გიგი წერეთელმა ტყიბულში, სოფელ მუხურაში მოსახლეობასთან შეხვედრა გამართა

„ევროპული საქართველოს“ მაჟორიტარობის კანდიდატმა ზესტაფონის, თერჯოლის, ტყიბულისა და ბაღდათის ოლქში, გიგი წერეთელმა ტყიბულში, სოფელ მუხურაში მოსახლეობასთან შეხვედრა გამართა.

როგორც „ინტერპრესნიუსს“ „ევროპული საქართველოდან“ აცნობეს, შეხვედრაზე საუბარი იყო პოლიტიკური გუნდის პროგრამაზე და იმ სირთულეებზე რომლებიც ამ სოფლის მაცხოვრებლების წინაშე დგას.

გიგი წერეთლის თქმით, განსაკუთრებულ პრობლემას გზა წარმოადგენს, ვინაიდან ყოველწლიურად, მკაცრი ზამთრის პირობებში გადაადგილება პრაქტიკულად სრულად იზღუდება ტყიბულთან დამაკავშირებელ გზაზე, რაც გაუსაძლისს ხდის ცხოვრებას. ამიტომ, სოფლის უმთავრესი მოთხოვნა თერჯოლა-მუჯირეთის გზის რეაბილიტაციაა, რაც თითქმის 400 ოჯახს მოუხსნის გადაადგილების პრობლემას.

შეხვედრაში მონაწილეობდა "ევროპული საქართველოს" დეპუტატი ოთარ კახიძე, რომელმაც ეს საკითხი პარლამენტის სხდომაზეც დააყენა, თუმცა, როგორც პარტიის მიერ გავრცელებულ ინფორმაციაშია აღნიშნული, ხელისუფლების მხრიდან რაიმე რეაგირება არ მომხდარა. აღნიშნული გზის რეაბილიტაციის მოთხოვნით, სოფლის მოსახლეობა და ახალგაზრდა აქტივისტები ტყიბულში საპროტესტო აქციის გამართვასაც გეგმავენ.

გიგი წერეთელმა აღნიშნა, რომ სოფელ მუხურაში არის სკოლის პრობლემაც. მოსახლეობის განმარტებით, ახალი სკოლის მშენებლობაზე მილიონები დაიხარჯა, თუმცა შესაძლო კორუფციისა და უხარისხოდ შესრულებული სამშენებლო სამუშაოების გამო, სკოლა არ ფუნქციონირებს.

„ამ ულამაზეს სოფელს თანადგომა სჭირდება და მათი სათხოვარი უყურადღებოდ არ უნდა დარჩეს. ადამიანებს საკუთარი შრომით სურთ არჩინონ ოჯახები და ამის საშუალება უნდა ჰქონდეთ. საბიუჯეტო თანხები არასწორად იხარჯება, იფლანგება, არაკომპეტენტური ბიუროკრატია კი არაფერს იკლებს და ხალხის გასაჭირი არ ესმის. ამიტომაც, არჩევნების შემდეგ გარდამტეხი ცვლილებები გარდაუვალია”, - განაცხადა გიგი წერეთელმა.

ემილ ავდალიანი - სამხრეთ კავკასიის რეგიონმა დიდი ძალების მეტოქეობის ხანაში შეაბიჯა, დღეს თამაშის ახალი წესები ყალიბდება,  მტკივნეული და გარდამავალი პერიოდია
ქართული პრესის მიმოხილვა 14.04.2021
როგორ ჩატარდება ერთიანი ეროვნული გამოცდები? - შარშანდელ რეკომენდაციებში შესაძლოა, კორექტირება შევიდეს - ინტერვიუ სოფიო გორგოძესთან
გიორგი კეკელიძის ახალი ინიციატივა: აპრილი წიგნის ჩუქების თვედ გამოცხადდეს
თანაბარი განათლება მაღალმთიანი სოფლების ბავშვებს
ვასილ ხოდელი - ლიბერთის ნებისმიერი სესხი გაიცემა საბაზრო პირობებით