კორონავირუსის შესაძლო შემთხვევის გამო, რესტორანი „რესპუბლიკა“ დროებით დაიკეტა. როგორც "ინტერპრესნიუსს" რესტორნის გენერალურმა მენეჯერმა, თაკო კვერნაძემ განუცხადა, ერთ-ერთ თანამშრომელს კორონავირუსისთვის დამახასიათებელი სიმპტომები აქვს, რის გამოც მენეჯმენტმა უსაფრთხოებიდან გამომდინარე რესტორნის დაკეტვის გადაწყვეტილება მიიღო.

"თანამშრომელს აქვს სიმპტომები, რომელიც ძალიან ჰგავს კოვიდისას, შესაბამისად, პასუხს ველოდებით, ვიდრე ყველა არ გაიტესტება", - განაცხადა თაკო კვერნაძემ.

მისივე თქმით, შესაბამისი რეჟიმი სავარაუდოდ, გაგრძელდება რამდენიმე დღეს. ამასთან, როგორც მენეჯერი ამბობს, დაკეტილია "რესპუბლიკის მხოლოდ ზედა რესტორანი, ქვედა რესტორანი კი აგრძელებს სტუმრების მიღებას" და აღნიშნულ ნაწილთან შესაძლო ინფიცირებულს კონტაქტი არ ჰქონია.