ლევან დავითაშვილი ზესტაფონში მეტყევეებს შეხვდა

გარემოს დაცვისა და სოფლის მეურნეობის მინისტრი, ლევან დავითაშვილი ზესტაფონში, ახალმოწყობილ „საქმიან ეზოში“ ეროვნული სატყეო სააგენტოს უფროსთან არჩილ ნიკოლეიშვილთან ერთად, მეტყევეებს შეხვდა. ინფორმაციას გარემოს დაცვისა და სოფლის მეურნეობის სამინისტრო ავრცელებს.

უწყების ცნობით, „ტყის ახალი კოდექსის“ მიღების შემდეგ, ინტენსიურად ხორციელდება სატყეო რეფორმა, რომლის ფარგლებში ე.წ. „საქმიანი ეზოები“ საქართველოს ყველა მუნიციპალიტეტში მოეწყობა.

„ქვეყანაში აქტიურად ხორციელდება სატყეო რეფორმა, რომელიც სატყეო მეურნეობის განვითარებას ითვალისწინებს. ხე-ტყის დამზადების ახალი პრაქტიკა საშუალებას მოგვცემს, მომავალში, სოციალური ჭრა ეტაპობრივად შევცვალოთ ისეთი ტიპის მომსახურებით, რომელიც უფრო კომფორტული იქნება ჩვენი მოსახლეობისთვის, ბიზნესისთვის და შესაძლებლობას მოგვცემს, ყველა მსურველი ალტერნატიული ენერგიით მოვამარაგოთ. საუბარია ალტერნატიულ ბიომასაზე, მათ შორის ბრიკეტებზე, რომელიც ეკოლოგიურად მისაღები, თანამდროვე საწვავი საშუალებაა. საქმიანი ეზოები საშუალებას მოგვცემს, ის უამრავი ბიოლოგიური ნარჩენი, რომელიც ტყეშია გამოვიტანოთ და ერთი მხრივ, ტყის სანიტარული მდგომარეობა მნიშვნელოვნად გავაუმჯობესოთ და მეორე მხრივ, მოსახლეობას შეშის ალტერნატიული პროდუქტი შევთავაზოთ. ეროვნული სატყეო სააგენტოს შესაძლებლობების გაძლიერება, მოდერნიზება და თანამედროვე ტექნიკით აღჭურვა კი, განსაკუთრებით მნიშვნელოვანია საქმიანობის ეფექტიანი განხორციელებისთვის“, - აღნიშნა ლევან დავითაშვილმა.

როგორც ეროვნული სატყეო სააგენტოს უფროსმა, არჩილ ნიკოლეიშვილმა განაცხადა, სააგენტოს მიზანი სოციალური ჭრის სატყეო სააგენტოს კომფორტული სერვისებით ჩანაცვლებაა. ზესტაფონის ახლად შექმნილი „საქმიანი ეზო“ დაახლოებით 30-მდე სოფელს მოემსახურება და მნიშვნელოვნად გაუმარტივებს მოსახლეობას ხე-ტყის შეძენას.

სოფლის მეურნეობის სამინისტროს ინფორმაციით, ეროვნული სატყეო სააგენტო ხე-ტყის დამზადების პრაქტიკას ცვლის. სოციალური ჭრები ეტაპობრივად გაუქმდება, სააგენტო ორგანიზებულად განახორციელებს ხე-ტყის დამზადებას, დახარისხებასა და დასაწყობებას ე.წ. „საქმიან ეზოებში“.

„აღნიშნული ცვლილება გაუადვილებს მოსახლეობას და კერძო სექტორს ხე-ტყის შეძენას და ტრანსპორტირებას მათთვის სასურველ პერიოდში.

აღსანიშნავია, რომ ტყის ახალი კოდექსი, სატყეო სექტორის რეფორმის მნიშვნელოვან ნაწილს წარმოადგენს, რომლის მთავარი მიზანია მრავალმიზნობრივი ტყითსარგებლობის დამკვიდრება, ტყის ეკოსისტემების შენარჩუნება და დაცვა, სოციალური და ეკონომიკური სარგებლის გონივრული გამოყენება. ე.წ. „საქმიანი ეზოს“ მოწყობა, კოდექსით გათვალისწინებულ სხვა სიახლეებთან ერთად, წარმოადგენს ტყის მდგრადი მართვის დანერგვის ერთ-ერთ მთავარ ინსტრუმენტს.

„საქმიანი ეზოს“ მოწყობის სამუშაოები საქართველოს თითქმის ყველა რეგიონში მიმდინარეობს. „საქმიანი ეზო” უკვე მოეწყო საგარეჯოში, გურჯაანში, თელავსა და სოფელ ლისში. წლის ბოლომდე, ქვეყნის მასშტაბით, 26 „საქმიანი ეზო“ მოეწყობა. შედეგად, მერქნული რესურსის დამზადების მიზნით ტყითსარგებლობა გაცილებით ეფექტიანად განხორციელდება, შემცირდება უკანონო ჭრები და ტყეზე უარყოფითი გავლენა. ღონისძიებას ადგილობრივი თვითმმართველობის წარმომადგენლები ესწრებოდნენ“, - ნათქვამია უწყების მიერ გავრცელებულ ინფორმაციაში.

ალექსანდრე თვალჭრელიძე - არაფერი შეცვლილა, ჩვენ ვფართხალებთ, ვაქტიურობთ,  მაგრამ პოლიტიკური მატარებელი როგორც მუშტაიდის ბაღში, წრეზე დარბის
ქართული პრესის მიმოხილვა 25.10.2021
მეთიუ ბრაიზა - მიხეილ სააკაშვილის დაბრუნებამ კრიზისული სიტუაცია კიდევ უფრო გაამძაფრა, მაგრამ ყოფილი პრეზიდენტის დაკავება არ იყო ჭკვიანური პოლიტიკური ნაბიჯი
კახა ოქრიაშვილი - ბატონი სააკაშვილი ჰიტლერი რომ ყოფილიყო, 2011 წელს, როცა ბიძინა ივანიშვილმა პოლიტიკაში მოსვლის შესახებ განაცხადა, ყველა მხუთავი აირის კამერაში მოხვდებოდა