მარკოზ აჭარელის ქუჩაზე, წყალმომარაგების ახალი ქსელის მოწყობა მიმდინარეობს. როგორც „ინტერპრესნიუსს“ ბათუმის მერიიდან აცნობეს, პროექტის ფარგლებში აბონენტების ახალ ქსელზე დაერთება განხორციელდება.

მიმდინარე სამუშაოებს ბათუმის მერის მოვალეობის შემსრულებელი, არჩილ ჩიქოვანი და „ბათუმის წყლის“ გენერალური დირექტორი, მარიკა გვიანიძე ადგილზე გაეცვნენ.

„მარკოზ აჭარელის ქუჩის მცხოვრებლებს, არასოდეს ჰქონიათ გამართული და მოწესრიგებული წყალმომარაგების სისტემა. წყლის მიწოდებასთან დაკავშირებით ხშირად იქმნებოდა პრობლემები. ჩვენ დავიწყეთ წყალმომარაგების ახალი ქსელის მოწყობა. კომპანია „ბათუმის წყალი" მოსახლეობის ახალ ქსელზე დაერთებებს განახორციელებს, რის შედეგადაც, უახლოეს პერიოდში, 200-მდე ადამიანს 24 საათიან რეჟიმში უწყვეტად მიეწოდება სასმელი წყალი", - განაცხადა ბათუმის მერის მოვალეობის შემსრულებელმა არჩილ ჩიქოვანმა.