დავით ბაქრაძე - ქვეყანას უნდა ჰყავდეს მთავრობა, რომელიც არა ბატონი, არამედ მსახური იქნება, ხალხი მოიყვანს და გაუშვებს მთავრობას
„ევროპულმა საქართველომ“ კასპში მერობის კანდიდატად პარტიის კასპის ორგანიზაციის თავმჯდომარე გიორგი ხელაშვილი წარადგინა.
როგორც ხელაშვილის წარდგენისას პარტიის ლიდერმა დავით ბაქრაძემ განაცხადა, წლების განმავლობაში ქართულ პოლიტიკაში ტენდენციაა, რომ პოლიტიკოსები ხელისუფლებაში არიან საკუთარი თავისთვის და არა ხალხის პრობლემების მოსაგვარებლად.
„რაც წლების განმავლობაში გრძელდება ქართულ პოლიტიკაში არის ის, რომ პოლიტიკოსები არიან საკუთარი თავისთვის და არა ხალხისთვის, ის, რომ პოლიტიკოსები ხალხს ჰპირდებიან საკუთარი მოგებისთვის და არა ხალხისთვის, ის, რომ პოლიტიკოსებს ხალხი ახსენდებათ არჩევნების წინ საკუთარი ხმებისთვის და არა ხალხის პრობლემებისთვის.
ეს პრობლემები დგას უკვე წლები, წლები, წლები ქართულ პოლიტიკაში. როდესაც ვლაპარაკობთ გარდამტეხ ცვლილებებზე, ერთ-ერთი ცვლილება, რომელიც უნდა მოვიტანოთ არის სწორედ ეს, რომ პოლიტიკა უნდა ემსახურებოდეს ხალხს, პოლიტიკოსები ემსახურებოდნენ ხალხს და ამ ქვეყანას ჰყავდეს მთავრობა, რომელიც ბატონი კი არ იქნება, ხალხის მსახური იქნება, ხალხი მოიყვანს და გაუშვებს მთავრობას. ეს არის ერთ-ერთი ცვლილება, რომელიც ამ ქვეყანას ამ არჩევნებზე უნდა მოვუტანოთ“, - განაცხადა ბაქრაძემ.
