ჩოხატაურის მუნიციპალიტეტის სოფელ ზემო ხეთში აჭარიდან ჩასულ ოჯახის ერთ - ერთი წევრს კოვიდ 19 დაუდგინდა. დაავადებათა კონტროლის საზოგადოებრივი ჯანმრთელობის ეროვნული ცენტრის გურიის განყოფილების ინფორმაციით, ინფიცირებულის ოჯახის წევრები თვითიზოლაციაში იმყოფებიან და მათ კონტაქტი აღნიშნული სოფლის მცხოვრებლებთან არ ჰქონიათ.
„ინფიცირებულს მისი ბიოლოგიური მასალის კვლევის შედეგი სოფელში ჩასვლისთანავე აცნობეს. ის მაშინვე გადაიყვანეს შესაბამისი პროფილის კლინიკაში და იქ აგრძელებს მკურნალობას. რაც შეეხება ოჯახის ოთხ წევრს, ისინი ზემო ხეთში, თვითიზოლაციაში არიან და "პი სი არ“ კვლევის შედეგებს ელიან. მათ ჩოხატაურის სოფელში კონტაქტები არ ჰქონიათ“, - განაცხადა დაავადებათა კონტროლის საზოგადოებრივი ჯანმრთელობის ეროვნული ცენტრის გურიის განყოფილების ხელმძღვანელმა, არჩილ მჟავიამ.