ცაგერის მუნიციპალიტეტში კორონავირუსით ინფიცირებულთა კონტაქტების მიზნობრივი ტესტირება გრძელდება

ცაგერის მუნიციპალიტეტის მასშტაბით, კორონავირუსით ინფიცირებულ პაციენტებთან კონტაქტში მყოფ პირთა დადგენის მიზნით, კვლევები გრძელდება,- ამის შესახებ „ინტერპრესნიუსს“ ამბროლაურის, ლენტეხის, ონის, ცაგერის მუნიციპალიტეტებში სახელმწიფო რწმუნებულის ადმინისტრაციიდან აცნობეს,

სახელმწიფო რწმუნებულის მოვალეობის შემსრულებელი, გიორგი მაქარაშვილი არსებული ვითარების გასაცნობად ადგილზე იმყოფებოდა. მან რეგიონის ოთხივე მუნიციპალიტეტის მერს დაავალა უწყებათაშორისი საკოორდინაციო საბჭოს გადაწყვეტილებით დაწესებული შეზღუდვების მაქსიმალური კონტროლი.

„ამ ეტაპზე, ცაგერის მუნიციპალიტეტში გვაქვს 5 დადასტურებული შემთხვევა და ველოდებით უკვე ჩატარებული ტესტირების პასუხებს. დადგენილია კონტაქტები მუნიციპალიტეტის 4 სოფელში და ამ დრომდე აღებულია 121 პირის ბიოლოგიური ნიმუში. პასუხების ნაწილი საღამომდე გვეცოდინება, რის მიხედვითაც, საჭიროების შემთხვევაში, სპეციალისტებთან ერთად მივიღებთ შესაბამის ზომებს. ეპიდვითარების ეფექტურად კონტროლისთვის, აუცილებელია გავითვალისწინოთ და მკაცრად დავიცვათ უწყებათაშორისი საკოორდინაციო საბჭოს მიერ დაწესებული მოთხოვნები. ვთხოვ რეგიონის თითოეულ მცხოვრებს, გამოვიჩინოთ მაღალი სამოქალაქო პასუხისმგებლობა, დავიცვათ საკუთარი და ჩვენი ოჯახის წევრების უსაფრთხოება“,- განაცხადა გიორგი მაქარაშვილმა.

„ცაგერში კორონავირუსის შემთხვევების დადასტურებისთანავე, რაჭა-ლეჩხუმისა და ქვემო სვანეთის საზოგადოებრივი ჯანდაცვის რეგიონული ცენტრისა და ცაგერის საზოგადოებრივი ჯანდაცვის ცენტრის ეპიდემიოლოგების მიერ 4 სოფელში დაიწყო მიზნობრივი ტესტირება და მასობრივი თერმოსკრინინგი. ამ დრომდე, სამ სოფელში - ლაჯანაში, სპათაგორსა და ორბელში მოძიებული კონტაქტების 121 ნიმუშია გადაგზავნილი კვლევისათვის ლაბორატორიაში, რომელთა პასუხები დღის ბოლომდე გახდება ცნობილი. კონტაქტების მოძიება და მიზნობრივი ტესტირება გრძელდება.

შეგახსენებთ, რომ ცაგერის მუნიციპალიტეტში კორონავირუსის 5 შემთხვევა დადასტურდა. აღნიშნული შემთხვევებიდან ყველა თბილისში გამართულ ხალხმრავალ ქორწილს უკავშირდება“, - ნათქვამია ინფორმაციაში.

ემილ ავდალიანი - სამხრეთ კავკასიის რეგიონმა დიდი ძალების მეტოქეობის ხანაში შეაბიჯა, დღეს თამაშის ახალი წესები ყალიბდება,  მტკივნეული და გარდამავალი პერიოდია
ქართული პრესის მიმოხილვა 14.04.2021
როგორ ჩატარდება ერთიანი ეროვნული გამოცდები? - შარშანდელ რეკომენდაციებში შესაძლოა, კორექტირება შევიდეს - ინტერვიუ სოფიო გორგოძესთან
გიორგი კეკელიძის ახალი ინიციატივა: აპრილი წიგნის ჩუქების თვედ გამოცხადდეს
თანაბარი განათლება მაღალმთიანი სოფლების ბავშვებს
ვასილ ხოდელი - ლიბერთის ნებისმიერი სესხი გაიცემა საბაზრო პირობებით