ზუგდიდის მუნიციპალიტეტის სოფელ ინგირში ფიზიკური დაპირისპირების შედეგად, შუახნის მამაკაცი მძიმედ დაშავდა. არსებული ინფორმაციით, მომხდარს ყოფით ნიადაგზე დაწყებული უთანხმოება უძღოდა.

დაზარალებული ზუგდიდის რეფერალურ ჰოსპიტალშია მოთავსებული.

როგორც მედიკოსები აცხადებენ, პაციენტი კომატოზურ მდგომარეობაში, მართვით სუნთქვაზე იმყოფება.

" 112 სამსახურის მიერ კლინიკაში შემოიყვანეს, შუა ხნის მამაკაცი, რომელსაც აღენიშნება ქალა ტვინის ღია ტრავმა, თავის ტვინის დაჟეჟილობა, ფუძის მოტეხილობა. თავის ტვინის შეშუპება. სასიცოცხლო ჩვენებებით გაიყვანეს ოპერაციულ ჩარევაზე. ამის შემდეგ კრიტიკული მედიცინის განყოფილებაში გადმოიყვანეს.

მდგომარეობა არის მძიმე, კომატოზური. იმყოფება მართვით სუნთქვაზე",- აცხადებენ საავადმყოფოში.

შს სამინისტრომ მომხდართან დაკავშირებით გამოძიება ჯგუფური ძალადობის ფაქტზე, სისხლის სამართლის კოდექსის 126-ე მუხლის პირველი პრიმა ნაწილის “ბ” ქვეპუნქტით დაიწყო.