აჭარაში სარიტუალო დარბაზებში წესების დაცვა და პირბადის ტარება უგულებელყოფილია, - ამის შესახებ აჭარის საზოგადოებრივი ჯანდაცვის ცენტრის ხელმძღვანელმა რუსუდან შავიშვილმა ბრიფინგზე განაცხადა. იგი ბათუმში სარიტუალო დარბაზებში გამოვლენილ კორონავირუსის შემთხვევებს გამოეხმაურა და აღნიშნა, რომ ხშირ შემთხვევაში სარიტუალო დარბაზებში დაინფიცირებული პირები ინფორმაციას მალავენ.

„ჩაღრმავებული გამოკითხვის დროს არც ერთი არ აფიქსირებდა სარიტუალო დარბაზში ყოფნის ფაქტს, გუშინ უკვე წამოვიდნენ შემხვედრ ნაბიჯებზე და უკვე ასახელებენ სარიტუალო დარბაზებს, თარიღებს. აქამდე პაციენტები არ ამბობდნენ, ვფიქრობ, რომ წესის დაცვა პირბადეების ტარება უგულებელყოფილია სარიტუალო დარბაზებში და ალბათ ამას უკავშირებდნენ, რომ ნებსით თუ უნებლიედ, გახდნენ ყველაფრის დამრღვევები. ახლა როდესაც ეპიდსიტუაციის გართულება დაიწყო, ალბათ უფრო ჩათვალეს საჭიროდ რომ დაეფიქსირებიათ ეს პოზიცია. სარიტუალო დარბაზებში დაინფიცირებულ შემთხვევათა რიცხვი დაზუსტებული არ არის ",- აცხადებს რუსუდან შავიშვილი.