დღეს, სააგენტოს „აწარმოე საქართველოში” ორგანიზებით, ჰუალინგის, ფოთის და თბილისის თავისუფალი ინდუსტრიული ზონის წარმომადგენლებსა და საერთაშორისო საინვესტიციო ლოკაციების კონსულტანტებს შორის პირველი სამუშაო შეხვედრა გაიმართა.
როგორც „ინტერპრესნიუსს“ „ჰუალინგის თავისუფალი ინდუსტრიული ზონიდან“ აცნობეს, შეხვედრა გაიმართა საინვესტიციო ლოკაციების კონსულტანტი წამყვანი ევროპული და ამერიკული კომპანიების - FDI Center, Conway, Inc. და Heritage Consulting საქართველოში პირველი გაცნობითი ტურის ფარგლებში. სამივე მათგანს ტრანსნაციონალურ კომპანიებსა და მთავრობებთან ერთად სხვადასხვა საინვესტიციო პროექტებზე მუშაობის მრავალწლიანი გამოცდილება აქვს.
გამართულ შეხვედრას ესწრებოდა ჰუალინგის თიზ-ის კომერციული მენეჯერი გიორგი როგავა, რომელმაც შეხვედრის ფარგლებში ისაუბრა ჰუალინგის თიზ-ში ოპერირების უპირატესობებზე და ბოლო წლების მანძილზე განხორციელებულ წარმატებულ ინდუსტრიულ პროექტებზე.
„პირდაპირი უცხოური ინვესტიციების მოსაზიდად საერთაშორისო ლოკაციების კონსულტანტებთან თანამშრომლობა ხელს შეუწყობს, როგორც საქართველოს, ასევე უშუალოდ თიზ-ების საინვესტიციო პოტენციალის პოპულარიზაციას“, - აცხადებს ჰუალინგის თიზ-ის კომერციული მენეჯერი, გიორგი როგავა.