სეტყვის საწინააღმდეგო სისტემის მუშაობით ახმეტის და თელავის რაიონებში სეტყვასაშიში პროცესები შესუსტდა
კახეთის რეგიონში სეტყვის საწინააღმდეგო სისტემის მუშაობის შედეგად ახმეტის და თელავის რაიონებში სეტყვასაშიში პროცესები მნიშვნელოვნად შემსუბუქდა.
როგორც „ინტერპრესნიუსს“ „ბუნებრივ მოვლენებზე აქტიური ზემოქმედების ცენტრიდან“ აცნობეს, ფრონტალური ტიპის სეტყვასაშიში ღრუბლის მასები რეგიონში დღის მეორე ნახევარში ჩრდილო-დასავლეთ მიმართულებიდან გავრცელდა და ეტაპობრივად მოიცვა ახმეტის და თელავის რაიონები.
„123 კმ2 საერთო ფართობის მქონე ღრუბლის მასებმა რეგიონში შემოიტანა უკვე ჩამოყალიბებული სეტყვის მარცვლების დიდი მასა. კრიტიკულ ეტაპზე სეტყვის მოსვლის ალბათობამ 100 % შეადგინა, მოსალოდნელი მარცვლების ზომა კი 35 მმ-მდე მერყეობდა.
ბუნებრივ მოვლენებზე აქტიური ზემოქმედების ცენტრის მიერ 15:49-დან 19:52- საათამდე ღრუბლის მასები სამ ეტაპად დამუშავდა, გასროლილი იქნა 120 ერთეულამდე რაკეტა. დამუშავების პროცესი დასახლებული პუნქტების არსებობის გათვალისწინებით შეზღუდვების პირობებში მიმდინარეობდა“, - აღნიშნულია ინფორმაციაში.
მათივე ცნობით, სარაკეტო დამუშავების შედეგად რეგიონში შემოსული ფრონტალური ატმოსფერული პროცესების არსებულ მასშტაბებში შეკავება მოხერხდა და სეტყვის მოსვლა ძირითადად სროლისთვის შეზღუდულ სექტორებში დასახლებულ პუნქტებში დაფიქსირდა.
ბუნებრივ მოვლენებზე აქტიური ზემოქმედების ცენტრის მიერ მონიტორინგი 24 საათიან რეჟიმში გრძელდება.
