კორონავირუსით ინფიცირების 57 დადასტურებული შემთხვევიდან, 2 რუსთავში დაფიქსირდა. როგორც „ინტერპრესნიუსთან" საუბარში, რუსთავის საზოგადოებრივი ჯანმრთელობის დაცვისა და უსაფრთხო გარემოს უზრუნველყოფის ცენტრის ხელმძღვანელმა დავით ბეგაშვილმა განაცხადა, ორი ახალი დადასტურებული შემთხვევიდან, ერთს აჭარაში მოგზაურობის ისტორია აქვს, მეორე კი რუსთავის ერთ-ერთი კლინიკის მედპერსონალია.

„ორი ახალი დადასტურებული შემთხვევიდან, ერთის - მედპერსონალის ინფიცირების წყარო ამ ეტაპზე უცნობია, მიმდინარეობს ეპიდემიოლოგიური კვლევა და კონტაქტების მოძიება. რაც შეეხება მეორეს, მისი ინფიცირების წყარო ცნობილია და ბათუმს უკავშირდება, ახალგაზრდა ქალი ბათუმში ქორწილში იმყოფებოდა, მისი კონტაქტების წრე დიდი არ არის", - განაცხადა დავით ბეგაშვილმა.

29 აგვისტოდან დღემდე, რუსთავში კოვიდინფიცირების 24 დადასტურებული შემთხვევაა.