ბათუმში, ევროპის მოედანზე მოქალაქეები ბელარუსი ხალხის მხარდამჭერ აქციას მართავენ. სოლიდარობის ნიშნად, აქციის მონაწილეებმა ერთი კილომეტრის მანძილზე ფერადი ლენტებით „ცოცხალი ჯაჭვი“ შეკრეს.

მათი განცხადებით, აქცია თავისუფლებისთვის მებრძოლ ბელარუს ხალხს ეძღვნება.

"აქცია გამოხატავს მხარდაჭერას და სოლიდარობას თავისუფლებისათვის მებრძოლი ბელარუსი ხალხისადმი. ჩვენ გვაქვს გამოცდილება გაყალბებული არჩევნების. ჩვენ მხარდაჭერას ვუცხადებთ ამ ხალხს თავისუფლების და სამართლიანობისათვის ბრძოლაში. შევეცადეთ, რომ მათი დროშის ფერებში ყოფილიყო წარმოდგენილი ეს აქცია. ბევრი ბელარუსი, ჩვენს ქალაქში დროებით მცხოვრები, შემოუერთდა აქციას. ასევე უკრაინელებიც. ეს ის ადამიანებია, ვინც კარგად იცის ერთიანობის, სამართლიანობის ფასი და შესაბამისად, დღევანდელი ჩვენი აქციაც გამოიწვია სწორედ ამან.

დაახლოებით, ჩვენი გათვლით 3000- მდე ადამიანი მონაწილეობს ამ „ცოცხალ ჯაჭვში“ ", - განაცხადა აქციის ორგანიზატორმა ასმათ დიასამიძემ.