ფოთში, კორონავირუსის ახალი შემთხვევა დაფიქსირდა. ინფიცირებული ახალგაზრდა მამაკაცია.

საზოგადოებრივი ჯანდაცვის ადგილობრივი ცენტრის ინფორმაციით, ის თბილისში იმყოფებოდა, სადაც კონტაქტი ჰქონდა კოვიდინფიცირებულთან და კვლევის ჩასატარებლად ლაბორატორიას თავად მიმართა.

„კორონავირუსი დაუდასტურდა 24 წლის ბიჭს, რომელიც იყო თბილისში და კონტაქტი ჰქონდა კოვიდინფიცირებულთან. კლინიკური გამოვლინება ძალიან სუსტი სიმპტომატიკით აქვს, მშრალი ხველა და ყელის ტკივილი. თვითონ მიმართა გამოსაკვლევად ლაბორატორიას.

კონტაქტების გამოკვლევა დავიწყეთ, ჯერჯერობით სრულად არ არის მოკვლეული, მაგრამ თითქმის 80% , ანუ დაახლოებით 25 ადამიანი გამოვიკვლიეთ, მათი პასუხები ხვალ დილით გვეცოდინება“, - განაცხადა საზოგადოებრივი ჯანდაცვის ფოთის ცენტრის დირექტორის მოადგილემ, ზინაიდა გაგუამ.

ცნობისთვის, გასული დღე-ღამის განმავლობაში ქვეყანაში კორონავირუსის 152 ახალი შემთხვევაა დაფიქსირდა, ამ დროისთვის, საქართველოში stopcov.ge-ის მონაცემებით რეგისტრირებულია 2227 დადასტურებული შემთხვევა. გამოჯანმრთელებულთა რიცხვი შეადგენს 1369-ს, სულ ქვეყანაში კორონავირუსს ემსხვერპლა 19 ადამიანი.