რაჭა-ლეჩხუმისა და ქვემო სვანეთის სახელმწიფო რწმუნებულის ადმინისტრაციაში, რეგიონში კორონავირუსის გავრცელების პრევენციის მიზნით შექმნილი საგანგებო სიტუაციების მართვის შტაბის სხდომა გაიმართა. ამის შესახებ ინფორმაციას რაჭა-ლეჩხუმისა და ქვემო სვანეთის სახელმწიფო რწმუნებულის ადმინისტრაცია ავრცელებს.
მათივე ინფორმაციით, სხდომაზე მიღებული გადაწყვეტილებით, რეგიონში შემავალ ცენტრალურ საავტომობილო გზებზე საკონტროლო პუნქტები მოეწყობა.
აღნიშნულ სხდომაზე ასევე განიხილეს მუნიციპალიტეტებში ჩასატარებელი სადეზინფექციო სამუშაოების დეტალური გრაფიკები. ამჟამად, რეგიონის მასშტაბით უკვე დაწყებულია ქუჩების, საზოგადოებრივი თავშეყრის ადგილების, ადმინისტრაციული და სხვა შენობების დეზინფექცია.
„სულ გაიხსნება 3 პუნქტი მთავარ საავტომობილო გზებზე. კერძოდ, ამბროლაურის მუნიციპალიტეტში 1 პუნქტი შაორის ტბის მიმდებარე ტერიტორიაზე, ხოლო ცაგერის მუნიციპალიტეტში ორი: ერთი ქორენიში-ტვიშის მიმდებარედ, ხოლო მეორე გელავერის უღელტეხილზე. აღნიშნულ პუნქტებზე მოხდება რეგიონში შემომსვლელ და რეგიონიდან გამსვლელ მოქალაქეთა თერმოსკრინინგი 24-საათიან რეჟიმში. ცაგერის მუნიციპალიტეტის ტერიტორიაზე ამჟამად მოქმედი პუნქტები კი შეწყვეტენ ფუნქციონირებას.
სხდომას ხელმძღვანელობდა სახელმწიფო რწმუნებულის მოვალეობის შემსრულებელი გიორგი მაქარაშვილი. სხდომას ესწრებოდნენ რეგიონის მაჟორიტარი დეპუტატი გოჩა ენუქიძე, სახელმწიფო რწმუნებულის მოადგილეები, რეგიონში შემავალი ოთხივე მუნიციპალიტეტის მერები, საკრებულოს თავმჯდომარეები, პოლიციის განყოფილებების ხელმძღვანელები, დაავადებათა კონტროლისა და საზოგადოებრივი ჯანდაცვის ცენტრის რეგიონული სამსახურის, სურსათის ეროვნული სააგენტოსა და სოციალური მომსახურების სააგენტოს რეგიონული სამსახურების ხელმძღვანელები,“ - ნათქვამია ინფორმაციაში.