ქვემო ქართლის რეგიონში, კორონავირუსის გავრცელების პრევენციის მიზნით, სადეზინფექციო სამუშაოები მიმდინარეობს. დილიდან ტარდება სადეზინფექციო სამუშაოები გარდაბანში, სადაც ბოლო 24 საათში კორონავირუსით ინფიცირების სამი შემთხვევა დაფიქსირდა.
როგორც „ინტერპრესნიუსთან“ საუბარში გარდაბნის მუნიციპალიტეტის მერმა რამაზ ბუდაღაშვილმა განაცხადა, სამივე გასულ დღეებში დაფიქსირებული შემთხევების კონტაქტია და შესაბამისად მათი ინფიცირების წყაროც ცნობილია.
„სადეზინფექციო სამუშაოებს ჩვენ პერიოდულად ვატარებთ, ამჟამად მიმდინარეობს საცხოვრებელი კორპუსების სადარბაზოების, სკვერების, ბავშვთა გასართობი მოედნებისა და საჯარო დაწესებულებებში არსებული ფართების დამუშავება სპეციალური ხსნარით, ასევე სავაჭრო ობიექტებისა და ხალხმარავალი ადგილების დეზინფექცია“, - განაცხადა გარდაბნის მუნიციპალიტეტის მერმა.