ბათუმის ინფექციურ საავადმყოფოში კორონავირუსით ინფიცირებული 9 არასრულწლოვანი მკურნალობს. როგორც კლინიკაში ჟურნალისტებს განუცხადეს, პაციენტების მდგომარეობა დამაკმაყოფილებელია.

"დღეს საავადმყოფოში 38 კოვიდდადასტურებული პაციენტი გვყავს, აქედან 9 არასრულწლოვანია, ყველაზე პატარა ერთი წლის და ორი თვისაა. ყველა არასრულწლოვანი მშობელთან ერთად იმყოფება საავადმყოფოში. ყველა მათგანის ჯანმრთელობის მდგომარეობა მსუბუქი მიმდინარეობითაა და დამაკმაყოფილებელია.

12 პაციენტი გვყავს პნევმონიით. დღეს ორი პაციენტი გადაგვყავს საკარანტინე სივრცეში.

კლინიკა მუშაობს სრული დატვირთვით. თავისუფალი ადგილები არ გვაქვს“, - განაცხადა ინფექციური საავადმყოფოს დირექტორმა ციური აბულაძემ.