„აღმოაჩინე შენი რეგიონი - ახალგაზრდები ტურიზმის სამსახურში“ - ასე ეწოდება პროექტს, რომელსაც გორის მერიის „განათლების ხელშეწყობისა და თანადაფინანსების პროგრამის“ ფარგლებში საზოგადოება ,,ბილიკი” ახორციელებს.
როგორც „ინტერპრესნიუსს“ გორის მერიიდან აცნობეს, პროექტი მიზანად ისახავს ახალგაზრდებისთვის არაფორმალური განათლების ხელშეწყობას ტურიზმის სფეროში, ადგილობრივი ტურისტული პოტენციალის გაცნობას, აგრო და ეკოტურიზმის პერსპექტივების შესწავლას. პროექტში მონაწილე ახალგაზრდები შეირჩნენ კონკურსის წესით.
მათივე ცნობით, ახალგაზრდებს ჩაუტარდათ ტრენინგ-სემინარები შემდეგ თემებზე - „ეკოტურიზმის პერსპექტივები შიდა ქართლში“, „ტურიზმი და მცირე ინფრასტრუქტურული ობიექტები“ და „აგროტურიზმი და მისი განვითარების გზები, სოფლის ტურიზმი შიდა ქართლში“.
„განათლების ხელშეწყობისა და თანადაფინანსების პროგრამა“ ხელს უწყობს არაფორმალური განათლების განვითარებას, რომლის საშუალებითაც გორის მუნიციპალიტეტში მცხოვრები ახალგაზრდები ბევრ საჭირო და სასარგებლო ინფორმაციას იღებენ. ამის დასტურია აღნიშნული პროექტიც, რომლის ფარგლებშიც გარდა თეორიული აქტივობებისა მოეწყო გასვლითი ტურებიც უფლისციხის მუზეუმ-ნაკრძალში და ატენის ხეობაში. ახალგაზრდებმა მოინახულეს ჩანჩქერი და ღვინის მარანი ,,შატო-ატენიც“. ისინი გაეცნენ პრაქტიკულ უნარ-ჩვევებსაც, ლაშქრობის დაგეგმვისა და განხორციელების შესახებ.“ - განაცხადა გორის მუნიციპალიტეტის მერიის განათლების განყოფილების უფროსმა ნინო ბერიანიძემ.