კორონავირუსის 196 ახალი შემთხვევიდან სამი შიდა ქართლში დაფიქსირდა. „გორის მუნიციპალიტეტის ტერიტორიაზე სამი ნიმუშის პასუხი დადებითია“, - განაცხადა შიდა ქართლის გუბერნატორის მოვალეობის შემსრულებელმა სიმონ გულედანმა.
მისივე ინფორმაციით, პირები, რომლებსაც კოვიდინფიცირება დაუდგინდათ, თვითიზოლაციაში იმყოფებოდნენ.
„14 და 15 სექტემბერს აღებული ნიმუშებიდან სამი დადებითია, სამივე ინფიცირებული, ბოლო დღეების განმავლობაში თვითიზოლაციაში იმყოფებოდა. ჩატარებული ეპიდემიოლოგიური ღონისძიებების ფარგლებში, დადგენილია ამ ადამიანებთან პირდაპირ და არაპირდაპირ კონტაქტში მყოფ პირთა წრეც და ისინიც გადაყვანილი არიან თვითიზოლაციაში. დაინფიცირებულები კი სამკურნალოდ სპეციალურ კოვიდ კლინიკებში მოთავსდნენ. ვითარება სრულად ექვემდებარება კონტროლს. სოფელ ქიწნისის მეურნეობის შესასვლელთან კვლავ მოქმედებს საკონტროლო პუნქტი და ყველა მოქალაქე, ვინც აღნიშნულ ტერიტორიაზე გადაადგილდება, თერმოსკრინინგს და PCR ტესტირებას ექვემდებარება“, - განაცხადა შიდა ქართლის გუბერნატორტის მოვალეობის შემსრულებელმა, სიმონ გულედანმა.
შეგახსენებთ, გორის მუნიციპალიტეტში ბოლო რამდენიმე დღის განმავლობაში კოვიდინფიცირების 8 შემთხვევა გამოვლინდა.