ჩვენი ქვეყანა მართლაც შევიდა ტურბულენტურ ზონაში, მაგრამ, საბედნიეროდ, ჩვენი ხომალდის მეთაური არის გამოცდილი, დიდი ქველმოქმედი, უაღრესად შეყვარებული თავის ხალხზე და ქვეყანაზე, ადამიანი, ძალიან მაგარი ეკიპაჟით,- ამის შესახებ საპარლამენტო უმრავლესობის წევრმა ირაკლი მეზურნიშვილმა პარლამენტის პლენარულ სხდომაზე განაცხადა, სადაც ეკონომიკისა და მდგრადი განვითარების მინისტრს, ნათია თურნავას ინტერპელაციის წესით უსმენენ.
მეზურნიშვილი აცხადებს, რომ აღნიშნული ეკიპაჟით მოგზაურობა მინიმუმ 4 წლის განმავლობაში გაგრძელდება და ოპოზიციას „ბედნიერ ფრენას“ უსურვებს.
„სხვათა შორის, ამ ხომალდში ოპოზიციაც იმყოფება. ძალიან კი ცდილობენ, პილოტი შეცვალონ, მაგრამ, საბედნიეროდ, ამ საკითხს განაგებს ხომალდში მგზავრთა უმრავლესობა, რომელსაც თქვენ, მეგობრებო, ნამდვილად არ წარმოადგენთ. ამიტომ, შემიძლია რჩევა მოგცეთ, ღვედი შეიკარით, დატკბით მოგზაურობით, რომელიც დარწმუნებული ვარ, ამ ეკიპაჟის მეთაურობით მინიმუმ 4 წელი გაგრძელდება. ასე რომ, ბედნიერ ფრენას გისურვებთ“,- განაცხადა მეზურნიშვილმა.