ბათუმის რესპუბლიკურ საავადმყოფოში კორონავირუსით ინფიცირებული 158 პაციენტიდან ერთის მდგომარეობა უკიდურესად მძიმეა.

როგორც კლინიკის ექიმი გია კიკაბიძე აცხადებს, 72 წლის მამაკაცი კლინიკაში გუშინ მოათავსეს, მას თანმხლები დაავადებებიც აღენიშნება.

"მამაკაცის მდგომარეობა არის უკიდურესად მძიმე, მას აქვს ინსულტი და ამჟამად მართვით სუნთქვაზე იმყოფება. რესპუბლიკურ საავადმყოფოში 158 კოვიდინფიცირებულია, 17 იმყოფება რეანიმაციაში, მათგან 5-ის მდგომარეობა არის მძიმე", - აცხადებს გია კიკაბიძე.

ინფორმაციისთვის, საქართველოში კორონავირუსით ინფიცირების შემთხვევათა რაოდენობა 196 -ით გაიზარდა და 3502 გახდა. რაც შეეხება გამოჯანმრთელებულთა რიცხვს, ქვეყანაში კორონავირუსისგან კიდევ 13 ადამიანი გამოჯანმრთელდა. შესაბამისად, მათ რაოდენობა 1494-ს შეადგენს.

ქვეყანაში კორონავირუსით პანდემიის დაწყებიდან დღემდე, სულ 19 ადამიანი გარდაიცვალა.