რუსი ოპოზიციონერი პოლიტიკოსი ალექსეი ნავალნი რუსეთისგან იმ ტანსაცმლის გადაცემას ითხოვს, რომელიც კომაში ჩავარდნის დროს ეცვა.
„სანამ ჩემს გერმანიაში გადმოყვანას დასთანხმდებოდნენ, მათ გამხადეს ტანსაცმელი და სრულიად შიშველი გამომაგზავნეს. იმის გათვალისწინებით, რომ ჩემს სხეულზე „ნოვიჩოკი“ აღმოაჩინეს, ჩემი ტანსაცმელი ძალიან მნიშვნელოვანი მტკიცებულებაა, ვითხოვ, ტანსაცმელი ფრთხილად ჩადონ პოლიეთილენის პარკში და დამიბრუნონ“, - წერს ნავალნი სოციალურ ქსელ „ფეისბუქში.“
შეგახსენებთ, ალექსეი ნავალნი, 20 აგვისტოს ომსკის კლინიკაში მას შემდეგ მოათავსეს, რაც თვითმფრინავში თავი შეუძლოდ იგრძნო და გონება დაკარგა. ის 22 აგვისტოს, ახლობლების მოთხოვნით, ბერლინის კლინიკაში გადაიყვანეს. ტრანსპორტირებიდან რამდენიმე დღეში გერმანიის მთავრობამ განაცხადა, რომ ნავალნი „ნოვიჩოკის“ ტიპის ნერვული აგენტითაა მოწამლული. რუსეთი ნავალნის მოწამვლასთან კავშირს უარყოფს.