ეკა ბესელია პრემიერის განცხადებაზე - წარსულის ნოსტალგია საკუთარი არასწორი მართვის და შედეგის არქონის ხაზგასმას აკეთებს

წარსულის ნოსტალგიები და ასეთი შედარებები, საკუთარი არასწორი მართვის და შედეგის არქონის ხაზგასმას აკეთებს, - ასე აფასებს პარტია „სამართლიანობისთვის" ლიდერი ეკა ბესელია პრემიერ გიორგი გახარიას განცხადებას, სადაც ის აცხადებს, რომ „საჩხერე უკვე ჩამოყალიბებულია, როგორც მოდელი, როგორი გვინდა, საქართველო დავინახოთ უახლოეს პერიოდში".

ეკა ბესელია დასძენს, რომ 8 წლის თავზე, არ არსებობს ქალაქი, რომელზეც მთავრობა იტყვის, რომ სანიმუშოა იმ შედეგებით, რაც მიაღწიეს.

„გამიჭირდება გამოვიცნო რა იგულისხმა პრემიერმა. ალბათ, ეს იყო მინიშნება, რომ კეთილმოწყობის და სოციალური პირობების თვალსაზრისით საჩხერე უკეთ გამოიყურება, ვიდრე სხვა ქალაქები. მე არ მგონია, რომ ეს კარგი შედარება იყოს პირველ რიგში მთავრობისთვის და მთავრობის მეთაურისთვის.

როდესაც 8 წლის თავზე, ჩვენ არ შეგვიძლია ვიამაყოთ სხვა ქალაქებით, რაიონებით ან რეგიონებით, რომლებიც სოციალური პრობლემების, მათ შორის, ინფრასტრუქტურული და ეკონომიკური თვალსაზრისით წინ წავიდა და მოდელია, ეს ნიშნავს, რომ წარუმატებელი პოლიტიკაა. საჩხერესთან ასეთი პარალელების გავლება, არამგონია „ქართული ოცნებისთვის" მომგებიანი იყოს", - განაცხადა ბესელიამ.

შეგახსენებთ, საქართველოს პრემიერ -მინისტრმა გიორგი გახარიამ საჩხერის, ჭიათურისა და ხარაგაულის მაჟორიტარი დეპუტატობის კანდიდატის პაატა კვიჟინაძის ჭიათურაში წარდგენისას განაცხადა, „საჩხერე უკვე ჩამოყალიბებულია, როგორც მოდელი, როგორი გვინდა, საქართველო დავინახოთ უახლოეს პერიოდში და ამაში ბიძინა ივანიშვილის პირდაპირი წვლილია".

ემილ ავდალიანი - სამხრეთ კავკასიის რეგიონმა დიდი ძალების მეტოქეობის ხანაში შეაბიჯა, დღეს თამაშის ახალი წესები ყალიბდება,  მტკივნეული და გარდამავალი პერიოდია
ქართული პრესის მიმოხილვა 12.04.2021
ლევან დოლიძე - რაც უფრო დიდხანს გაგრძელდება ვაშინგტონსა და ბრიუსელში ჩვენს შიდა პრობლემებზე მსჯელობა, მით უფრო გაგვიჭირდება მათთან იმ საკითხებზე საუბარი, რასაც ქვეყნის ინტერესები მოითხოვს
ვასილ ხოდელი - ლიბერთის ნებისმიერი სესხი გაიცემა საბაზრო პირობებით