აჭარის ჯანდაცვის მინისტრი - სამედიცინო პერსონალი ინფექციურ კონტროლს უნდა იცავდეს, კლინიკებში ხარვეზებზე რეაგირება იქნა მიღებული

აჭარის ჯანდაცვის მინისტრი ნინო ნიჟარაძე სამედიცინო პერსონალს ინფექციური კონტროლის ღონისძიებების დაცვისკენ მოუწოდებს.
მინისტრმა აჭარის სამედიცინო დაწესებულებებში არსებულ ხარვეზებზე განმარტება გააკეთა და განაცხადა, რომ მონიტორინგი აქტიურად მიმდინარეობს და ყველა ხარვეზი აღმოფხვრილია.
"ნებისმიერი კლინიკა ვალდებულია დაიცვას წესები, რადგან შესაძლოა, მათთან შემსვლელი პირი კოვიდინფიცირებული იყოს, ის იქნება ამბულატორიული თუ ჰოსპიტალური პაციენტი. კოვიდკლინიკებთან მოთხოვნები არის იგივე, პაციენტებთან მიმართებაში იქ შიდა მოძრაობებზე შეზღუდვებია. კოვიდკლინიკები და ცხელების ცენტრები ვალდებული არიან, მაქსიმალურად დაიცვან პირადი უსაფრთხოება. რა თქმა უნდა, მოქალაქეების შესვლა კი პროტოკოლით არის გაწერილი და მინიმუმამდე უნდა იყოს.
სამედიცინო პერსონალი, პირველ რიგში, ინფექციურ კონტროლს უნდა იცავდნენ. ყველა არის გაფრთხილებული და ხარვეზებზე რეაგირება იქნა მიღებული“,- განაცხადა ნიჟარაძემ.
რაც შეეხება კორონავირუსით გარდაცვლილ პაციენტს, ნიჟარაძის თქმით, მას ჰქონდა მძიმე ქრონიკული დაავადებები, რომლის პროვოცირება ვირუსული ინფექციით მოხდა.
ცნობისთვის, აჭარაში რამდენიმე კლინიკის სამედიცინო პერსონალი კორონავირუსით დაინფიცირდა, თავის მხრივ კლინიკაში მოთავსებული პაციენტები აცხადებენ, რომ წესების დაცვა სრულად არ ხდება.

























