ჩინეთის საგარეო უწყება მთიან ყარაბაღში სიტუაციის ესკალაციას ეხმიანება და მხარეებს უთანხმოების დიალოგის გზით გადაჭრისკენ მოუწოდებს.
„ჩინეთი დარწმუნებულია, რომ რეგიონში მშვიდობისა და სტაბილურობის შენარჩუნება ყველა მხარის, მათ შორის სომხეთისა და აზერბაიჯანის, ინტერესებშია. იმედი გვაქვს, მხარეები კონფლიქტის კიდევ უფრო გაზრდის პრევენციის მიზნით შესაბამის ზომებს მიიღებენ,“- განაცხადა ჩინეთის საგარეო საქმეთა სამინისტროს პრესსპიკერმა ვან ვენბინმა.
შეგახსენებთ, მეორე დღეა მთიან ყარაბაღში სომეხ და აზერბაიჯანელ სამხედროებს შორის შეიარაღებული დაპირისპირება მიმდინარეობს. მხარეები მძიმე არტილერიის გამოყენებაში ერთმანეთს ადანაშაულებენ. Reuters-ის ინფორმაციით, კონფლიქტის შედეგად ამ დრომდე დაღუპულია 21 და დაშავებულია ასობით ადამიანი. აღსანიშნავია, რომ დაღუპულებსა და დაშავებულებს შორის მშვიდობიანი მოქალაქეებიც არიან.