საქართველოში კორონავირუსის 314 ახალი შემთხვევიდან სამი სენაკში გამოვლინდა. საზოგადოებრივი ჯანდაცვის ადგილობრივი ცენტრის ინფორმაციით, „კოვიდ 19“ ერთ-ერთი ინფიცირებული ქალის ოჯახის წევრებს დაუდგინდა. მათივე თქმით, ერთის მდგომარეობა შედარებით მძიმეა და შესაბამისი პროფილის კლინიკაში გადაიყვანენ, სხვები კი ბინაზე, ოჯახის ექიმის მეთვალყურეობის ქვეშ დარჩებიან.
„ისინი აქამდე თვითიზოლაციაში იმყოფებოდნენ, იცავდნენ წესებს. ვინაიდან გუშინ მე-12 დღე იყო, გავტესტეთ და მივიღეთ დადებითი პასუხები. გუშინ ასევე გამოეხატათ ჩივილები, აღენიშნებოდათ ტემპერატურა. ამ სამი შემთხვევიდან, ერთი მამაკაცი, რომელსაც შედარებით მძიმე მდგომარეობა აქვს, გადაჰყავთ შესაბამისი პროფილის კლინიკაში, ორი ბინაზე რჩება და მათ მდგომარეობას ოჯახის ექიმი გააკონტროლებს“, - განუცხადა „ინტერპრესნიუსს“ სენაკის საზოგადოებრივი ჯანდაცვის ცენტრის უფროსმა, ანა ჭიჭაღუამ.