მარნეულში, საოლქო საარჩევნო კომისიასთან „ნაციონალური მოძრაობისა“ და „ქართული ოცნების“ აქტივისტები ერთმანეთს დაუპირისპირდნენ
მარნეულში, „ნაციონალური მოძრაობისა“ და „ქართული ოცნების“ აქტივისტები ერთმანეთს სიტყვიერად და ფიზიკურად დაუპირისპირდნენ. შემთხვევა მარნეულის საოლქო საარჩევნო კომისიასთან მაშინ მოხდა, როდესაც „ნაციონალური მოძრაობის“ წევრები აქციას მართავდნენ. ისინი საარჩევნო კომისიის შემადგენლობის დაკომპლექტებას აპროტესტებდნენ.
ოპოზიციის წარმომადგენელთა განმარტებით, მაშინ, როცა აქციას მართავდნენ მათთან „ქართული ოცნების“ აქტივისტი მივიდა, რომელმაც აქციის მონაწილეებს სიტყვიერი შეურაცხყოფა მიაყენა. ამის შემდეგ კი კონფლიქტი ფიზიკურ დაპირისპირებაში გადაიზარდა. დაპირისპირება პოლიციის ჩარევის შემდეგ განიმუხტა.
საპირისპიროს საუბრობენ მმართველი პარტიის წარმომადგენლები. მათი განმარტებით, საოლქო საარჩევნო კომისიასთან მომხდარი ინციდენტი „ნაციონალური მოძრაობის“ მიერ არის პროვოცირებული.
მომხდართან დაკავშირებით შინაგან საქმეთა სამინისტრომ გამოძიება დაიწყო.
