აჭარის მთავრობის თავმჯდომარის, თორნიკე რიჟვაძის განცხადებით, ეპიდვითარების მართვა შესაძლებლობას ქმნის, რომ მინიმალური დანაკარგებით მოხდეს გამოწვევის გამკლავება.

როგორც თორნიკე რიჟვაძემ მთავრობის სახლში გამართულ სხდომაზე განაცხადა, მთავრობის მთავარ ამოცანად რჩება ეპიდვითარების დინამიკისა და კონტროლის შენარჩუნება.

მან მოქალაქეებს ჯანდაცვის სამინისტროს რეკომენდაციების დაცვისკენ მოუწოდა, რათა რეგიონში ეპიდვითარება სწრაფად დასტაბილურდეს.

"დღეს რეგიონში 8 კოვიდმართვის ცენტრი მუშაობს, ამას "ცხელების ცენტრები" ემატება, სადაც პაციენტების მიღება მუდმივ რეჟიმში ხდება. აქვე იცით, რომ კოვიდსასტუმროებსა და ბინაზე მკურნალობის პროტოკოლი ამოქმედდა. ამ ყველაფერში პირველადი ჯანდაცვის რგოლია ჩართული და სისტემატურად გადის შესაბამის მომზადებას. ჩვენთვის მთავარ ამოცანად რჩება, დინამიკისა და კონტროლის შენარჩუნება ეპიდმართვის თვალსაზრისით. ამის პარალელურად ჩვენს მოქალაქეებთან ერთად გავაგრძელოთ იმ რეკომენდაციების დაცვა, რომელიც საბოლოო ჯამში მოგვცემს საშუალებას, რომ ეპიდვითარება გახდეს სტაბილური. რაც ყველაზე მნიშვნელოვანია, ამ მართვამ უნდა მოგვცეს საშუალება, რომ მინიმალური დანაკარგებით შევძლოთ გამოწვევის გამკლავება“, - განაცხადა თორნიკე რიჟვაძემ.