ისრაელის საელჩო საქართველოში და გალერეა „უსახელო“ მხატვრულ პროექტს - "ებრაული მეხსიერების მცველები" წარმოადგენენ, - ამის შესახებ ინფორმაციას ისრაელის საელჩო ავრცელებს.

საელჩოს ცნობით, ექსპრესიული გამოფენა ასახავს საქართველოში ებრაელთა ცხოვრების მდიდარ მემკვიდრეობასა და მცდელობებს, შენარჩუნდეს ხსოვნა იმ თემის, ოჯახებისა და ადამიანების, რომლებიც საქართველოში აღარ არიან.

„ებრაული თემი ყოველთვის იყო ქვეყნის მრავალეთნიკურობის განუყოფელი ნაწილი. მეხსიერება ამის შესახებ მივიწყების რისკის ქვეშ დგას,“- ნათქვამია საელჩოს განცხადებაში.

მათი ინფორმაციით, პროექტის ავტორი - ებრაელი მწერალი, ფოტოგრაფი და ციფრული მთხრობელი არიანე სვიეცაა, კურატორი - გიორგი როდიონოვი, მხარდამჭერი კი - ისრაელის საელჩო საქართველოში.

გამოფენა თბილისში, ბერი გაბრიელ სალოსის პირველი შესახვევის N2-ში, „ღია სივრცეში“ 2 ოქტომბერს გაიხსნება და მნახველს 13:00-20:00 საათებში უმასპინძლებს.

„გამოფენა ერთი თვის განმავლობაში გაგრძელდება, რომლის პარალელურად გაიმართება საუბრები ებრაული საზოგადოების დღევანდელ გამოწვევებსა და ცხოვრებაზე საქართველოში. ღია საუბრებში მოწვეული იქნებიან, როგორც საქართველოში ებრაული თემის წარმომადგენლები, ასევე მკვლევარები.

უფრო ვრცლად იხილეთ ღონისძიების ლინკი: https://www.facebook.com/events/876580839540128“, - ნათქვამია ინფორმაციაში.