უკრაინაში, ლუგანსკის ოლქში გაჩენილ ტყის ხანძარს 4 ადამიანის სიცოცხლე შეეწირა, - ამის შესახებ ინფორმაციას მედია უკრაინის საგანგებო სიტუაციების სამსახურზე დაყრდნობით ავრცელებს.

მათივე ინფორმაციით, სტიქიის შედეგად დაშავებულია 10 ადამიანი.

ხანძარმა საფრთხე შეუქმნა 22 დასახლებას და დაახლოებით 18 000 ჰექტარი ფართობი მოიცვა.

ადგილობრივი ხელისუფლების წარმომადგენლების ინფორმაციით, ამ დრომდე ხანძრის 146 კერიდან 82-ის ჩაქრობა მოხერხდა.

უკრაინის პრეზიდენტის ადმინისტრაციამ სამართალდამცავ ორგანოებს მოუწოდა, ხანძრის გამომწვევი მიზეზები დაადგინონ.