„მოძალადე, გადადექი“ - ამ შეძახილებით მარნეულის საკრებულოს შენობასთან ოპოზიციის წარმომადგენლებმა საპროტესტო აქცია გამართეს. აქციის მონაწილეები საკრებულოს თავმჯდომარის ამირან გიორგაძის გადადგომას ითხოვდნენ. აქციის ერთ-ერთი მონაწილის, „ევროპული საქართველოს“ მარნეული-გარდაბნის მაჟორიტარი დეპუტატობის კანდიდატის, ახმედ იმამკულიევის განცხადებით, მარნეულში მომხდარი დაპირისპირების კადრებში სწორედ ამირან გიორგაძე ჩანს.
„ასეთი მოძალადე პიროვნება არ უნდა იყოს საკრებულოს თავმჯდომარე, ასეთი ადამიანები არ უნდა იყვნენ მერიაში წარდგენილები. ჩვენ როგორც ვნახეთ ვიდეოკადრებში, იქ იყო ამირან გიორგაძე, იქ იყვნენ მერიის წარმომადგენლები და ის პიროვნებები, რომლებიც მარნეულის მუნიციპალიტეტიდან იღებენ ხელფასს. ჩვენ მოვითხოვთ, რომ ასეთი პიროვნებები აღარ იყვნენ მარნეულის მუნიციპალიტეტსა და საკრებულოში,“- განაცხადა ახმედ იმამკულიევმა.