ქობულეთის მუნიციპალიტეტის მერიის შენობაში ხმაური იყო, სადაც საოჯახო სასტუმროების მეპატრონეებმა საპროტესტო აქცია გამართეს.
აქციის მონაწილეების განცხადებით, მათი მთავარი მოთხოვნაა, ბანკებიდან აღებული სეზონური სესხების ერთი წლით გადავადება და ნამატი პროცენტის სრული სუბსიდირება მოხდეს.
მათი ინფორმაციით, მუნიციპალიტეტის მერიიდან 20 დღეა პასუხს ელოდებიან, თუმცა უშედეგოდ.
"ქობულეთის მერიაში 20 დღის წინ პირობა მოგვცეს, რომ ამ პრობლემას მოაგვარებდნენ. ყოველ დღე ბანკებიდან გვიკავშირდებიან და სესხის გადახდას გვთხოვენ, რისი საშუალებაც არ გვაქვს.
მოვითხოვთ, რომ იანვრამდე სესხების გადავადება მოხდეს, რადგან ტურისტულ სეზონზე დავზარალდით", - განაცხადეს აქციის მონაწილეებმა.
თავის მხრივ, ქობულეთის მერიაში განაცხადეს, რომ კანონის ფარგლებში საკითხზე მუშაობა მიმდინარეობს და უახლოეს პერიოდში მოგვარდება.
"საკითხის ყველა დონეზე მუშაობა მიმდინარეობს, რათა კანონის შესაბამისად პრობლემა მოგვარდეს და უახლოეს პერიოდში საკითხი ვიმედოვნებთ, რომ მოგვარდება",- აცხადებენ ქობულეთის მერიაში.