მაღალ კლასებში სწავლის 29 დეკემბრამდე სრულად დისტანციურად გაგრძელების საკითხთან დაკავშირებით განათლების სამინისტრო განმარტავს, რომ მინისტრის ბრძანებაში თარიღის დაფიქსირება პირობითია.

განათლების სამინისტროს განმარტებით, ბრძანებაში VII-XII კლასის მოსწავლეებისთვის კლასებში სწავლის დაწყების თარიღი 29 დეკემბერი პირობითად ჩაიწერა და კორონავირუსთან დაკავშირებით შექმნილმა უწყებათაშორისმა საკოორდინაციო საბჭომ, შესაძლოა, გადაწყვეტილებას გადახედოს.

ცნობისთვის, ბრძანებაში, რომელიც განათლების მინისტრმა გამოსცა, აღნიშნულია, რომ ქალაქებში - თბილისში, ქუთაისში, რუსთავსა და ზუგდიდში მაღალ კლასებში სწავლება 29 დეკემბრამდე დისტანციურ რეჟიმში გაგრძელდება.

შეგახსენებთ, რომ 1-ელი ოქტომბრიდან თბილისის, ქუთაისის, რუსთავისა და ზუგდიდის სკოლების I-დან VI კლასის მოსწავლეები სწავლას საკლასო ოთახებში აგრძელებენ. რაც შეეხება VII-XII კლასის ჩათვლით მოსწავლეებს, აღნიშნულ ქალაქებში მათთვის სწავლა კვლავ ონლაინ რეჟიმში მიმდინარეობს.