კავკასიის მედიცინის ცენტრი სამედიცინო მხარდაჭერის პროგრამის ფარგლებში პაციენტებს დამატებით ბენეფიტს სთავაზობს და გეგმური ქირურგიული სერვისის მიღებამდე მათ უფასო PCR ტესტებით უზრუნველყოფს. აღნიშნულის შესახებ „ინტერპრესნიუსს“ „ევექსი ჰოსპიტლებიდან“ აცნობეს.

როგორც მათ ინფორმაციაშია აღნიშნული, ეს გადაწყვეტილება სამედიცინო მხარდაჭერის პროგრამის ფარგლებში ჰოსპიტლის მორიგ ბენეფიტს წარმოადგენს და პაციენტებისთვის დამატებითი ხარჯების შემცირებას ემსახურება. „კავკასიის მედიცინის ცენტრში გეგმური სამედიცინო პროცედურების წინ PCR ტესტის მასალის აღება სრულიად უფასოდ 15 ოქტომბრიდან წლის ბოლომდე იქნება შესაძლებელი. კავკასიის მედიცინის ცენტრი მკაცრად იცავს ჯანდაცვის მსოფლიო ორგანიზაციის მიერ გაცემულ რეკომენდაციებს და ქმნის სრულიად უსაფრთხო გარემოს პაციენტებისთვის. სამედიცინო ცენტრი მხოლოდ არაინფიცირებულ პირებს ემსახურება. გეგმიურ და ურგენტულ პაციენტებს კი ჰოსპიტალიზაციამდე დადგენილი პროტოკოლით გათვალისწინებული საჭირო კვლევები უტარდებათ“, - ნათქვამია გავრცელებულ ინფორმაციაში.