ფრაქცია „ნაციონალური მოძრაობის“ თავმჯდომარე რომან გოცირიძე პატიმრობაში მყოფი კარტოგრაფების ივერი მელაშვილისა და ნატალია ილიჩოვას მონახულებას აპირებს და პენიტენციურ დაწესებულებაში სპეციალური ნებართვის გარეშე შესვლის უფლების მისაღებად პარლამენტის თავმჯდომარეს მიმართავს.
როგორც გოცირიძემ ჟურნალისტებს განუცხადა, ის წინასწარ გაივლის ვირუსზე ტესტირებას, რათა უარის სათქმელად პანდემია არ მოიმიზეზონ.
გოცირიძე ივერი მელაშვილსა და ნატალია ილიჩოვას სინდისის პატიმრებს უწოდებს და აცხადებს, რომ წინასაარჩევნოდ მათ მიმართ ჩადენილია უზნეობა და უპრეცედენტო უსამართლობა.
„ასეთი უპრეცედენტო უსამართლობა ბერიას დროსაც არ ხდებოდა. იყო „გენეტიკოსების საქმე“, როცა საწყალი ბიოლოგები იმის გამო დაიჭირეს, რომ სოფლის მეურნეობის პროდუქციაზე გენეტიკულ კვლევებს ატარებდნენ. მაშინ ითვლებოდა, რომ გენეტიკა ბურჟუაზიული მეცნიერება იყო და მას შემდეგ საბჭოთა კავშირში გენეტიკის ხსენება მოკვდა. რუსეთში ბიოლოგები კვლევების გამო ციხეში ჩასვეს. აი, სწორედ ამ მასშტაბის დანაშაულთან გვაქვს საქმე - არაფერი დაკარგულა, არაფერი შეთანხმებულა და ყველაფერი რაც ახლა კეთდება, არის სიცრუე“, - განაცხადა რომან გოცირიძემ ჟურნალისტებთან საუბრისას.
ოპოზიციონერმა დეპუტატმა ხაზგასმით აღნიშნა, რომ საქართველო-აზერბაიჯანის საზღვრის დამდგენი კომისიის ფარგლებში საკუთრივ დავით გარეჯთან დაკავშირებით რაიმე დონეზე შეთანხმება არ ყოფილა.