ნებისმიერი სახის დანაშაული, ამომრჩევლის დაშინების, შანტაჟის მცდელობა სულ რაღაც 2 კვირაში ხელისუფლების კრახით დასრულდება, - ასე აფასებს "ნაციონალური მოძრაობის" ერთ-ერთი ლიდერი ნიკა მელია გასულ დღეებში ოპოზიციური პარტიების საარჩევნო ბანერების დაზიანების ფაქტებს.
მისი თქმით, ასეთი ქმედება ხელისუფლებას მძიმე შედეგს მოუტანს, რაც იმას ნიშნავს, რომ "ქართული ოცნება" 31 ოქტომბერს დამარცხდება.
"ეს არ არის ის პროცესი, რომელიც ხელისუფლებისთვის წარმატებით დაგვირგვინდება, გამორიცხულია. ეს არის ის პროცესი, რომელიც მძიმე შედეგებს, პირველ რიგში, მოუტანს ამ ხელისუფლებას. ისინი ათვითცნობიერებენ, რომ დარწმუნების მეთიდი აღარ მუშაობს. ვერ არწმუნებენ მოსახლეობას, რომ მხარი უნდა დაუჭირონ ივანიშვილის ჯგუფს, დიახაც, ივანიშვილის ჯგუფს და არა ხელისუფლებას. მიმაჩნია, რომ ჩვენს ქვეყანას ხელისუფლება არ ჰყავს, არამედ ჰყავს ჯგუფი მართვის სადავეებთან. ნებისნიერი სახის დანაშაული, ამომრჩევლის დაშინების, შანტაჟის მცდელობა სულ რაღაც 2 კვირაში ხელისუფლების კრახით დასრულდება. როდესაც ხელისუფლება ვეღარ არწმუნებს ამომრჩეველს ასლან აბაშიძის გზას ადგება, რომელიც გულისხმობს ამომრჩეველზე ძალადობას და ეს ყველაფერი როგორ მთავრდება უახლოესმა წარსულმა არაერთხელ დაადასტურა ჩვენს ქვეყანაში. გამონაკლისი ვერ იქნება "ქართული ოცნება". "ქართული ოცნება" ოპოზიციასთან დიდი სხვაობით დამარცხდება 31 ოქტომბერს",განაცხადა მელიამ.