ვეტერანების საქმეთა სახელმწიფო სამსახურში, უწყების ახალმა დირექტორმა, გენერალ-მაიორმა, კობა კობალაძემ მედიის წარმომადგენლებთან შეხვედრა გამართა. ამის შესახებ „ინტერპრესნიუსს“ ვეტერანების საქმეთა სახელმწიფო სამსახურიდან აცნობეს.
მათი ინფორმაციით, კობა კობალაძემ ჟურნალისტებს სამსახურის სამომავლო გეგმები გააცნო.
როგორც ვეტერანების საქმეთა სახელმწიფო სამსახურში აღნიშნავენ, მან ვრცლად ისაუბრა სამშობლოს წინაშე ომისა და თავდაცვის ძალების ვეტერანების დამსახურებისა და იმ გამოწვევების შესახებ, რომლებიც როგორც სამსახურის, ასევე, მისი ბენეფიციარების წინაშე ჯერ კიდევ არსებობს; ისაუბრა ამ გამოწვევათა დაძლევის გზებზე.
კობა კობალაძემ სტუმრებს მადლობა გადაუხადა და აღნიშნა, რომ მედიის როლი განსაკუთრებით დიდია საზოგადოებრივი აზრის ფორმირებაში.
„მნიშვნელოვანი და მისასალმებელია ჯანსაღი კრიტიკა, მაგრამ, ამასთანავე, აუცილებელია, მედია უფრო ხშირად საუბრობდეს არა მხოლოდ სამსახურის წინაშე არსებული პრობლემებზე, არამედ ვეტერანების _ სამშობლოსათვის ამ თავდადებული მეომრების ღვაწლსა და დამსახურებაზე სამშობლოს ერთიანობის, თავისუფლებისა და დამოუკიდებლობისათვის ბრძოლაში. ამას უდიდესი მნიშვნელობა აქვს მომავალი თაობების ცნობიერების ჩამოყალიბებასა და სახელმწიფოებრივი აღმშენებლობის პროცესში მათ ჩართვაში“,-განაცხადა კობა კობალაძემ.