მოძრაობამ „შემახე ამნისტია“ ამნისტიის აქტის გამოცემის მოთხოვნით პარლამენტის შენობის წინ აქცია გამართა. აქციას ასევე შეუერთდა პარტია „სამართლიანობისთვის“ ლიდერი ეკა ბესელია. ბესელიას განცხადებით, ის პრობლემა, რაც სასამართლოს „კლანური მმართველობის“ სახით აქვს, ახალ პარლამენტში უნდა დაიძლიოს.
„მე ვუერთდები ამ იდეას და მინდა ჩემი სოლიდარობა გამოვხატო იმ ოჯახების მიმართ, ვინც მიიჩნევს, რომ მათ სამართლიანი სასამართლოს უფლებით ვერ ისარგებლეს და მიაჩნიათ, რომ ის პრობლემა, რაც დღეს სასამართლოს კლანური მმართველობის სახით აქვს, ახალ პარლამენტში უნდა დაიძლიოს ახალი ამნისტიის აქტის გამოცემით ისე, რომ დაზღვეული იყოს ყველა რისკი, რომელიც უკავშირდება საზოგადოებრივ უსაფრთხოებას“, - განაცხადა ბესელიამ.
აქციის ორგანიზატორის ალექსანდრე კობაიძის განცხადებით, ახალი მოწვევის პარლამენტმა უმოკლეს ვადაში უნდა მიიღოს ამნისტიის აქტი.
„ჩვენ შევქმენით მემორანდუმი და ვთავაზობთ პირველ რიგში, „ქართულ ოცნებას“ და შემდეგ ნებისმიერ ოპოზიციურ ძალას, რომ მოაწეროს ხელი და შევთანხმდეთ იმაზე, რომ გონივრულ ვადაში, არაუმეტეს ამ წლის დეკემბრისა, მიიღებენ ამნისტიას. ამას განაპირობებს ის, რომ ციხეებში გავრცელდა კორონავირუსი, რათა არ მოხდეს ამ ვირუსის გავრცელება, აუცილებელია, ახალმა პარლამენტმა პირველივე შესაძლებლობისთანავე იმუშავოს იმ კანონპროექტზე, რომელიც 1-ელ სექტემბერსააა დარეგისტრირებული“, - განაცხადა კობაიძემ.