სასამართლოს თავმჯდომარის გარეშე ვერ დავტოვებდი, ვინაიდან თვითონ თავმჯდომარეს აქვს ზოგიერთი ისეთი უფლებამოსილება, რასაც სხვა ვერ შეასრულებს, - ამის შესახებ იუსტიციის უმაღლესი საბჭოს მდივანმა ნიკოლოზ მარსაგიშვილმა ჟურნალისტებს განუცხადა, როდესაც ისაუბრა თბილისის საქალაქო სასამართლოს თავმჯდომარის მოვალეობის შემსრულებლად სერგო მეთოფიშვილის დანიშვნის თაობაზე.

ნიკოლოზ მარსაგიშვილმა განმარტებები გააკეთა საბჭოს არამოსამართლე წევრის, ნაზი ჯანეზაშვილის კრიტიკაზე, რომლის თანახმადაც სერგო მეთოფიშვილი ისე დაინიშნა თბილისის საქალაქო სასამართლოს თავმჯდომარის მოვალეობის შემსრულებლად, რომ ამავე სასამართლოს მოსამართლეებთან ამ საკითხზე კონსულტაციები არ ყოფილა.

„ამ გადაწყვეტილების მიღება მოხდა იქიდან გამომდინარე, რომ თავმჯდომარის დანიშვნა ითვალისწინებს გარკვეულ პროცედურებს, რომელიც ვადებთან არის დაკავშირებული. დღეს, ამ პროცედურას ჩვენ ვერ ჩავატარებდით, მითუმეტეს, რომ მოსამართლეებთან კონსულტაცია იმ სასამართლოში, სადაც რაოდენობივად ყველაზე მეტი მოსამართლეა, გაგვიჭირდებოდა. ამავე დროს, სასამართლოს თავმჯდომარის გარეშე ვერ დავტოვებდი, ვინაიდან თვითონ თავმჯდომარეს აქვს ზოგიერთი ისეთი უფლებამოსილება, რასაც სხვა ვერ შეასრულებს. აქედან გამომდინარე, „საერთო სასამართლოების შესახებ“ ორგანულ კანონში პირდაპირ მითითებულია, რომ თავმჯდომარის დანიშვნამდე შესაძლებელია ერთ-ერთ მოსამართლეს დაეკისროს თავმჯდომარის უფლებასმოსილება“, - განაცხადა ნიკოლოზ მარსაგიშვილმა.