მობილური ტელეფონით გადაღებული კადრებით დასტურდება, რომ ჯიჰადისტმა, რომელმაც ვენაში ოთხი ადამიანი მოკლა, თავდასხმა მარტო განახორციელა, - ამის შესახებ ავსტრიის შინაგან საქმეთა მინისტრმა კარლ ნეჰამერმა განაცხადა.

მისი თქმით, სამართალდამცავებს საზოგადოების წევრებმა მობილური ტელეფონით გადაღებული 20 000-ზე მეტი ვიდეო მიაწოდეს, რომლის ანალიზის შედეგადაც დადგინდა, რომ თავდასხმაში მხოლოდ ერთი შეიარაღებული პირი მონაწილეობდა.

ცნობილია, რომ თავდასხმასთან დაკავშირებით ავსტრიაში 18-დან 28 წლამდე ასაკის 14 ადამიანი დააკავეს და ამჟამად მიმდინარეობს გამოძიება იმის დასადგენად, არიან თუ არა ისინი რომელიმე ტერორისტული ორგანიზაციის წევრები. აღსანიშნავია, რომ თავდასხმასთან დაკავშირებით ორი ადამიანი დააკავეს შვეიცარიაშიც. ქვეყნის იუსტიცის მინისტრის თქმით, დაკავებულები იმ შეიარაღებული მამაკაცის მეგობრები არიან, რომელმაც ავსტრიაში თავდასხმა მოაწყო.

იხილეთ ვიდეო: ავსტრიის შს მინისტრი - შეიარაღებული პირი, რომელმაც ვენაში თავდასხმა მოაწყო, მარტო მოქმედებდა