თბილისის საქალაქო სასამართლომ ორგანიზაცია "ეს ქვეყანა ჩვენია"-ს სარჩელი ნაწილობრივ დააკმაყოფილა. როგორც „ინტერპრესნიუსს“ მოძრაობა „ხალხისთვის“ პრესსამსახურიდან აცნობეს, საქალაქო სასამართლომდე, ორგანიზაციის წარმომადგენლებმა ადმინისტრაციული საჩივრით ჩუღურეთის საოლქო საარჩევნო კომისიას მიმართეს, რომელმაც აღნიშნული საჩივარი განმხილველ დიდუბის საარჩევნო კომისიას არ გადაუგზავნა.
მათი ინფორმაციით, ეს ქმედება საჩივრის დაკმაყოფილებაზე უარის თქმად ჩაითვალა, რის შემდეგაც საქმემ საქალაქო სასამართლოში გადაინაცვლა.
„საქალაქო სასამართლოში გამართულ სხდომაზე ჩუღურეთის საუბნო კომისიების მიერ შედგენილი ყველა სადავო ოქმი განიხილეს, მათ შორის განსაკუთრებული დარღვევებით შედგენილი 06.07.05 და 06.07.11 შემაჯამებელი ოქმები. სასამართლომ კანონიერად მიიჩნია ორგანიზაციის მოთხოვნა და ნაწილობრივ ბათილად ცნო დიდუბის საოლქო საარჩევნო კომისიის გადაწყვეტილება საჩივრის დაკმაყოფილებაზე უარის თქმის შესახებ. დიდუბის საოლქო კომისიას დაევალა საჩივრის განხილვა და 06.07.05 და 06.07.11 საუბნო კომისიის თავმჯდომარისა და მდივნის პასუხისმგებლობის საკითხზე გადაწყვეტილების მიღება.
გარდა ამისა, ორგანიზაცია "ეს ქვეყანა ჩვენია"-ს წარმომადგენლები 13 ოქმის ბათილობას ითხოვდნენ, თუმცა აღნიშნული მოთხოვნა საქალაქო სასამართლომ არ დააკმაყოფილა“,-აღნიშნულია ინფორმაციაში.