არ ვიცი ვინ რა თქვა, მაგრამ მე პომპეოსთვის აქციების გამართვას არ ვაპირებ, ეს არის გამორიცხული. ის არის ჩვენთვის სტრატეგიული პარტნიორი და არ ვაპირებ აქციებით ველაპარაკო ჩემ სტრატეგიულ პარტნიორს, - ამის შესახებ “სტრატეგია აღმაშენებლის” ლიდერმა გიორგი ვაშაძემ ამერიკის სახელმწიფო მდივნის მაიკ პომპეოს საქართველოში ვიზიტთან დაკავშირებით განაცხადა.

მისივე თქმით, კარგი იქნება, თუ ოპოზიციას მაიკ პომპეოსთან შეხვედრისა და აზრების გაცვლის შესაძლებლობა ექნება.

“შეიძლება იყოს რაიმე სიმბოლური ღონისძიებები, თუმცა აქციებზე ლაპარაკი გამორიცხულია. პომპეოს ვიზიტი ასევე მნიშვნელოვანია რეგიონში არსებულ უსაფრთხოების საკითხებთან დაკავშირებით. რაც შეეხება ჩვენს შეხვედრებს, ამასთან დაკავშირებით ჯერ ჩვენ არ გვაქვს ინფორმაცია, შემთხვევით რუკაზე არ მოვხვდით მისი ვიზიტის ფარგლებში, იმიტომ, რომ ხედავენ დაძაბული სიტუაციაა ქვეყანაშიც, ასე, რომ ვფიქრობ, კარგი იქნება თუ გვექნება აზრების გაცვლის შესაძლებლობა”, - განაცხადა ვაშაძემ.

ცნობისთვის, მაიკ პომპეო საქართველოს 17 ნოემბერს ორდღიანი ვიზიტით ეწვევა.