ქართული პრესის მიმოხილვა 19.11.2020

მძიმე დარტყმა ოპოზიციისათვის - დასავლეთი პარლამენტში შესვლას ითხოვს

როგორ შეიძლება შევიდეს ოპოზიცია პარლამენტში ისე, რომ სახე შეინარჩუნოს - დემეტრაშვილი

ახალი რეგულაცია - რა შემთხვევაში მივა სასწრაფო გამოძახებაზე, თუ პაციენტს ეჭვი კორონავირუსზე აქვს

* * *

მძიმე დარტყმა ოპოზიციისათვის - დასავლეთი პარლამენტში შესვლას ითხოვს

“ოპოზიციამ მძიმე დარტყმა მიიღო და რთულ მდგომარეობაშია - მათ ხალხის მხარდაჭერა თანდათან ელევათ და ოთხშაბათს, საქართველოში აშშ-ის სახელმწიფო მდივნის, მაიკ პომპეოს ვიზიტის შემდეგ კი საბოლოოდ გაირკვა, რომ აღარც საერთაშორისო პარტნიორების მხარდაჭერა აქვთ. ამ ფაქტორების გარეშე კი, ანალიტიკოსთა უმრავლესობის შეფასებით, ოპოზიციას უკიდურესად გაუჭირდება ხელისუფლებაზე ზეწოლა ვადამდელ საპარლამენტო არჩევნებზე დასათანხმებლად და ახლა პრაქტიკულად იმაზე უნდა იზრუნონ, თუ როგორ შეცვალონ კოლექტიური ბოიკოტის გადაწყვეტილება და როგორ შევიდნენ პარლამენტში ისე, რომ სახე შეინარჩუნონ. არადა, დასავლეთის მხარდაჭერაზე ოპოზიცია დიდ იმედებს ამყარებდა და ეს მათთვის იმდენად მნიშვნელოვანი იყო, რომ თბილისში მაიკ პომპეოს ვიზიტის დღეს რუსთაველის გამზირზე საგანგებოდ მდუმარე აქციაც მოაწყვეს ყურადღების მისაქცევას”, - წერს გაზეთი “რეზონანსი” სტატიაში, სათაურით მძიმე დარტყმა ოპოზიციისათვის - დასავლეთი პარლამენტში შესვლას ითხოვს.

“საქართველოს დასავლელი პარტნიორები 31 ოქტომბრის საპარლამენტო არჩევნებზე მნიშვნელოვანი დარღვევების არსებობას არ უარყოფენ და საკმაოდ მკაცრ შეფასებებსაც აძლევენ, მაგრამ ამავდროულად არჩევნების პოზიტიურ შედეგებზეც საუბრობენ, მაგალითად, მათი შეფასებით, ეს იქნება ყველაზე მრავალფეროვანი პარლამენტი დამოუკიდებელი საქართველოს ისტორიაში, სადაც 9 პარტია იქნება წარმოდგენილი. ამის პარალელურად კი უკვე ღია ტექსტით მოუწოდებენ ოპოზიციურ პარტიებს, რომ პარლამენტში შესვლაზე უარი არ თქვან. ანალიტიკოსები ელიან, რომ ოპოზიციის ლიდერების უმეტესობა საბოლოოდ ამ დასკვნამდე მაინც მივა და სჯობია პომპეოს ვიზიტი პარლამენტში შევლის მიზეზად გამოიყენონ. ახსნან, რომ ანგარიშს დასავლეთს უწევენ და ბრძოლას ქუჩაში პარალელურად გააგრძელებენ. წინააღმდეგ შემთხვევაში ჩიხიდან გამოსავალს ვეღარ იპოვნიან. სამშაბათს, მაიკ პომპეოს თბილისიდან გამგზავრების შემდეგ, ოპოზიციის ლიდერებს მისი მოადგილე ფილიპ რიკერი შეხვდა. ამ შეხვედრის შემდეგ ოპოზიციის ლიდერები კვლავაც ვადამდელ საპარლამენტო არჩევნებზე საუბრობდნენ და აცხადებდნენ, რომ პარლამენტში არშესვლის გადაწყვეტილება არ გადაიხედება”, - აღნიშნავს გამოცემა.

"ის, რასაც ჩვენ ხელს ვუწყობთ, არის, რომ ოპოზიციამ ცვლილებისთვის პარლამენტიდან იბრძოლოს, ბოიკოტი აღარ გამოაცხადოს. თქვენ ამომრჩეველმა იმისთვის აგირჩიათ, რომ შეხვიდეთ პარლამენტში და მოახდინოთ ცვლილება. გასულ ზაფხულს მათ განახორციელეს საკონსტიტუციო ცვლილებები, რის შედეგადაც უფრო პროპორციული საარჩევნო სისტემა მიიღეს და ამ საარჩევნო სისტემამ, იმ ახალმა სისტემამ, ფაქტობრივად, იმუშავა. მათ უფრო მრავალფეროვანი პარლამენტი აქვთ, ვიდრე აქამდე ჰქონიათ, სადაც ცხრა პარტიაა წარმოდგენილი, რომლებიც ბევრად უფრო მრავალფეროვან პერსპექტივებსა და შეხედულებებს წარმოადგენენ. ამასთან, საარჩევნო ცვლილებების შედეგად პარლამენტში უფრო მეტი ქალია,“ - ამის შესახებ აშშ-ის სახელმწიფო დეპარტამენტში გამართულ სპეციალურ ბრიფინგზე განაცხადეს, სადაც ოფიციალურმა პირებმა საქართველოს შესახებ ისაუბრეს და ოპოზიციას პარლამენტში შესვლისკენ ღიად მოუწოდებენ - “ოპოზიციის მხრიდან ბოიკოტის გამოცხადება იგივეა, რაც უკვე ნანახი ფილმის ხელახლა ნახვა. ჩვენ მოვუწოდებთ მათ, შევიდნენ პარლამენტში, განახორციელონ საარჩევნო ცვლილებები, რომლის საფუძველზეც შემდეგი არჩევნები უკეთესი იქნება და ჩვენ არ ვნახავთ და ისინი არ ნახავენ ერთი და იმავე დარღვევების განმეორებას,“ - აცხადებენ სახელმწიფო დეპარტამენტში. ბრიფინგზე აღინიშნა, რომ აშშ-სა და ევროკავშირის ელჩები მხარეების დახმარებას ცდილობენ კომპრომისი მიღწევაში”, - განაგრძობს გამოცემა.

პარტია “მოქალაქეების” ლიდერმა ალეკო ელისაშვილმა კი განაცხადა, რომ შეხვედრაზე, უბრალოდ, აზრთა გაცვლა-გამოცვლა იყო. “ჩვენ მას არჩევნების გაყალბების ძალიან კონკრეტული დეტალები ვუთხარით, ასევე ის, თუ როგორ არ მუშაობს ჩვენთან ინსტიტუციები. მათი მხრიდან ამ ყველაფერზე არის წუხილი და უნდათ, რომ პარლამენტი და დემოკრატია ფუნქციონირებდეს და არჩევნებისადმი რწმენა იყოს. მათ ასევე გვითხრეს, თუ როგორ წარმოუდგენიათ მოვლენათა განვითარება - მშვიდად, წყნარად და კონსტიტუციურად. დღეს მოლაპარაკებები არ ყოფილა, უბრალოდ აზრთა გაცვლა-გამოცვლა იყო,“ - განაცხადა ელისაშვილმა. “გირჩის” ლიდერმა ზურაბ ჯაფარიძე კი აცხადებს, რომ მაიკ პომპეოს მოადგილე ფილიპ რიკერთან შეხვედრაზე ოპოზიცია ისევე, როგორც სხვა დროს, ერთიანი იყო. “ამ რეალობაში, რომელშიც ახლა ვართ, პარლამენტში შესვლა შეუძლებელია. გამოსავალი შესაძლოა იყოს მხოლოდ პოლიტიკური შეთანხმება, რომელიც მიიღწევა მხოლოდ იმ მოლაპარაკების მაგიდასთან, რომელსაც მოდერაციას აშშ-ისა და ევროკავშირის ელჩები უკეთებენ. თავად ელჩ რიკერის პოზიციაც ის იყო, რომ მოლაპარაკებები მნიშვნელოვანია და გამოსავალიც იქ შეიძლება იყოს მოძიებული. მას კარგად ესმის, თუ რა მასშტაბის კრიზისია საქართველოში,“ - განაცხადა ჯაფარიძემ. “ნაციონალური მოძრაობის” თავმჯდომარე გრიგოლ ვაშაძე კი იმ გარემოებაზე აკეთებს აქცენტს, რომ ფილიპ რიკერი ოპოზიციის ლიდერებთან შეხვედრის შემდეგ საქართველოში დარჩა”, - დასძენს გამოცემა.

“ის, რომ ელჩი რიკერი დარჩა საქართველოში და არ გაჰყვა სახელმწიფო მდივანს ისრაელში, იმის ინდიკაციაა, რომ ჩვენს სტრატეგიულ მოკავშირეს, ისევე, როგორც ევროკავშირს, შესანიშნავად ესმის, რაოდენ ღრმა არის პოლიტიკური კრიზისი საქართველოში და როგორ გვჭირდება ჩვენ ჩვენი სტრატეგიულ მოკავშირეთა დახმარება, რომ გამოსავალი მოვნახოთ. ყურადღებით მოისმინეს, რაც ჩვენ ვუთხარით ფაქტებით დარღვევებზე, გაყალბებაზე... სახელმწიფო დეპარტამენტის გზავნილი იყო ის, რომ გამომდინარე რთული ეკონომიკური, სოციალური ვითარებიდან, რეგიონში რთული მდგომარეობიდან, სასწრაფოდ საჭიროა საქართველოში კომპრომისის მონახვა. ჩვენს უკან დგას უამრავი ათასი საქართველოს მოქალაქე, რომელიც ითხოვს სამართლიანობის აღდგენას,“ - განაცხადა გრიგოლ ვაშაძემ. “სტრატეგია აღმაშენებლის” ლიდერმა გიორგი ვაშაძემ განაცხადა, რომ აშშ-ის სახელმწიფო მდივნის მოადგილისგან ნამდვილად იყო მინიშნება იმის თაობაზე, რომ ოპოზიციამ ბრძოლა პარლამენტში უნდა განაგრძოს, თუმცა ოპოზიცია უკვე მიღებული გადაწყვეტილების შეცვლას არ აპირებს”, - წერს სტატიის ავტორი.

“მინიშნება, რომ მნიშვნელოვანია საპარლამენტო ცხოვრება ქვეყნის დემოკრატიული განვითარებისთვის, ამაზე ნამდვილად იყო საუბარი, თუმცა ჩვენ ვუთხარით, რომ საქართველოს პარლამენტარიზმის 8-წლიანი ისტორია ადასტურებს, რომ პარლამენტში ოპოზიცია არის უუფლებო და მხოლოდ უმრავლესობას აქვს უფლებები, რაც ნიშნავს, რომ ასეთი პარლამენტი ვერანაირ შედეგს ვერ დადებს. ამიტომ, თუ რამეზე შეთანხმება უნდა მოხდეს, უნდა მოხდეს ამ დღეებში, ამ კვირებში, ამ დიალოგის ფორმატში, ჩვენ სხვა ნდობა არ გვაქვს “ქართულ ოცნებასთან“ მიმართებაში”, - განაცხადა გიორგი ვაშაძემ. ყოფილი სახელმწიფო მინისტრი პაატა ზაქარეიშვილი “რეზონანსთან” ამბობს, რომ მაიკლ პომპეოს ოპოზიციასთან არშეხვედრა და გზავნილი, რომელიც მათ მისი მოადგილისგან მიიღეს, რომ პარლამენტში უნდა შვიდნენ, ცალსახა იმის დემონსტრირებაა, რომ ამერიკა საქართველოში შიდა სტაბილურობას მხარს უჭერს. მისი თქმით, პომპეო ოპოზიციას მიზანმიმართულად არ შეხვდა, რადგანაც ეს ოპოზიციის ირიბი მხადაჭერა იქნებოდა და მათ კიდევ უდრო რადიკალიზებას გამოიწვევდა. ამიტომაც მან აირჩია ასეთი ტაქტიკა, რომ ქვეყანაში სიტუაციის დასტაბილურებისთვის ერთადერთი გამოსავალი პარლამენტში შესვლაა”, - განაგრძობს სტატიის ავტორი.

“პომპეოს ოპოზიციასთან არშეხვედრა მაშინვე იმის ნიშანი იყო, რომ ის მათი პარლამენტში შესვლის მომხრეა. არც უნდა ჰქონოდა ოპოზიციას იმის ილუზია, რომ ამერიკა რიტორიკას შეცვლიდა. ახლა საქართველო მათთვის რეგიონში ერთადერთი ნათელი წერტილია. შესაბამისად, არ სურთ შიდა რყევები და ამიტომაც ოპოზიციას პარლამენტში შესვლისკენ მოუწოდეს. მისი მხრიდან საკმაოდ სწორი გადაწყვეტილებაა, რადგანაც ეს ოპოზიციის კიდევ უფრო რადიკალიზებას გამოიწვევდა. ისინი ამას ამერიკის მხარდაჭერად ჩათვლიდნენ და ქვეყანაში სიტუაცია დაიძაბებოდა. ახლა კი არც დასავლეთის და არც ხალხის დიდი მხარდაჭერის გარეშე ოპოზიცია უბრალოდ იძულებული გახდება, რომ პარლამენტში შევიდეს. როგორ უნდა მოახერხონ, რომ სახე არ დაკარგონ, ეს რთული სათქმელია, უბრალოდ, ამ ჩიხიდან სხვა გამოსავალი აღარ არის. პომპეომ ნათლად მიანიშნათ, რომ ამერიკას საქართველოში დაძაბულობა და დაპირისპირება არ უნდა. ამიტომაც ნება იბოძეთ და გარკვეულ კონსესუსამდე მიდითო”, - აცხადებს გამოცემის კორესპონდენტთან საუბრისას პაატა ზაქარეიშვილი.

“ანალიტიკოს რამაზ საყვარელიძისთვის პომპეოს და მისი წარმომადგენლების განცხადებები მოულოდნელი არ ყოფილა. ის “რეზონანსთან” ამბობს, რომ ოპოზიცია ხიბლსა და ილუზიაში ჩავარდა. მათ შექნეს ფუჭი იმედი, რომ ამერიკა ივანიშვილს “თითს დაუქნევდა” და ეტყოდა, რომ არჩევნები გაყალბდა. “ხომ ამბობენ, რომ პროდასავლული ძალა ვართო, ჰოდა ახლა ამერიკის მოწოდებას ანგარიში გაუწიონ და თუ არ უნდათ, რომ სახე საბოლოოდ დაკარგონ, მაშინ პარალმენტში ამ არგუმენტით უნდა შევიდნენ. ოპოზიცია ხიბლსა და ილუზიაში ჩავარდა. ეგონათ, რომ რადგანაც პარალამენტში არ შევიდოდნენ და იქ მხოლოდ ერთპარტიული შემადგენლობა იქნებოდა, დასავლეთი ხელისუფლებაზე ზეწოლას გააძლიერებდა, მაგრამ შეცდნენ. ეუთო/ოდირმა, ევროკავშირმა და სხვა სადამკვირვებლო ორგანიზაციებმა არჩევნები აღიარეს და ოპოზიციის აღიარება-არაღიარება ვერაფერს შეცვლის. ველი, რომ გრიგოლ ვაშაძის მსგავსად, ძალიან ბევრი გამოცდილი პოლიტიკოსი, რომელიც ოპოზიციაშია, მიხვდება, რომ სხვა გზა არაა და პარლამენტში შევლენ. წინააღმდეგ შემთხვევაში 2024 წლისთვის ოპოზიცია ფაქტობრივად გაკოტრებული და დაქსაქსული გვეყოლება”, - ამბობს საყვარელიძე, რომლის დასკვნით, “იმედია, რომ პატარა პარტიების ლიდერებს გონიერება ეყოფათ და “ნაციონალების” შანტაჟს თავს დააღწევენ”, - დასძენს სტატიის ავტორი.

როგორ შეიძლება შევიდეს ოპოზიცია პარლამენტში ისე, რომ სახე შეინარჩუნოს - დემეტრაშვილი

“იმ შემთხვევაში, თუ ოპოზიცია მიიღებს გადაწყვეტილებას, რომ შევიდეს პარლამენტში, არ ვიცი, რა არგუმენტებს მოიშველიებს. ალბათ ექნებათ მყარი არგუმენტები - ეს შეიძლება იყოს რეგიონში შექმნილი გეოპოლიტიკური ვითარება, ქვეყანაში მძიმე ეკონომიკური და სოციალური მდგომარეობა, კოვიდ ეპიდემია და ა.შ."” - აცხადებს კონსტიტუციონალისტი ავთანდილ დემეტრაშვილი საერთაშორისო პარტნიორების მხრიდან ოპოზიციის მისამართით გაკეთებული მოწოდებების კომენტირებისას”, - წერს გაზეთი “რეზონანსი” სტატიაში, სათაურით როგორ შეიძლება შევიდეს ოპოზიცია პარლამენტში ისე, რომ სახე შეინარჩუნოს - დემეტრაშვილი.

“ევროპარლამენტარები თავიანთ განცხადებებში ოპოზიციას მანდატების მიღებას და არჩევნების მეორე ტურში მონაწილეობისკენ მოუწოდებენ. აშშ-ის სახელმწიფო დეპარტამენტის აზრით კი, ოპოზიციამ ცვლილებებისთვის პარლამენტში უნდა იბრძოლოს და ბოიკოტი არ გამოაცხადოს: “ოპოზიციის მხრიდან ბოიკოტის გამოცხადება იგივეა, რაც უკვე ნანახი ფილმების ხელახალი ნახვა. თქვენ ამომრჩეველმა იმისთვის აგირჩიათ, რომ შეხვიდეთ პარლამენტში და მოახდინოთ ცვლილებები”. ოპოზიცია აცხადებს, რომ მეორე ტურში მონაწილოებას არ მიიღებს და ალბათ ორ დღეში არაფერი არ შეიცვლება. მაგრამ მაინც მოუწევთ ახლად არჩეულ პარლამენტში შესვლა, რათა გაიარონ კანონით დადგენილი ყველა პროცედურა, რაც მათი უფლებამოსილების ცნობას უკავშირდება, უნდათ თუ არა ეს”, - აცხადებს გამოცემის კორესპონდენტთან საუბრისას ავთანდილ დემეტრაშვილი.

“შემდეგ მოდის სხვა პროცედურები, რომელიც დროში გაიწელება. გაუძლებს კი ოპოზიცია ამ სიტუაციას, რომ ყოველდღე ატაროს აქციები? მართალია, ოპოზიციას ვერავინ ეტყვის როგორ მოიქცეს, რადგან ეს მათი გადასაწყვეტია, მაგრამ თუ პარლამენტში შესვლას დააპირებენ, ალბათ ექნებათ მყარი არგუმენტები. ეს შეიძლება იყოს გეოპოლიტიკური მდგომარეობა რეგიონში, ქვეყანაში მძიმე ეკონომიკური ვითარება, კოვიდ-ეპიდემია, ან თქვან, რომ მთავრობა მოდის რაღაც დათმობებზე. ამ სიტუაციაში მთავრობაც უნდა წავიდეს დათმობებზე. მაგალითად, შეიძლება ოპოზიციას ახალ მთავრობაში შესთავაზოს რამდენიმე მინისტრის პოსტი”, - დასძენს ავთანდილ დემეტრაშვილი.

ახალი რეგულაცია - რა შემთხვევაში მივა სასწრაფო გამოძახებაზე, თუ პაციენტს ეჭვი კორონავირუსზე აქვს

“სწორად არ მიმაჩნია ის, რომ სასწრაფო დახმარება უნდა აკითხავდეს მხოლოდ იმ პაციენტებს, რომელთა ტემპერატურაც 38.8-ან მეტია, რადგან მაღალი ტემპერატურა არ წარმოადგენს უმთავრეს სიმპტომს. ჩემი აზრით, მთავარი სიმპტომი სუნთქვის უკმარისობაა, განსაკუთრებით ასაკოვან ადამიანებში. შესაძლოა პნევმონიით გარდაცვლილი პაციენტის ტემპერატურამ არ გადააჭარბოს 37.0 გრადუსს”, - ასე აფასებს ინფექციონისტი ირაკლი ხმალაძე სასწრაფო სამედიცინო დახმარების ბრიგადების გამოძახებაზე გასვლის ახალ წესს, რომლის მიხედვითაც, კორონავირუსზე ეჭვის შემთხვევაში, ბრიგადის გასვლა ხდება მაშინ, როცა პაციენტს აღენიშნება ტემპერატურა 38,8 ან მეტი, ხოლო ამ ტემპერატურაზე ნაკლების დაფიქსირების შემთხვევაში, მიუხედავად იმისა, რომ მას შეიძლება აღენიშნება სხვა სიმპტომები, სამედიცინო დახმარების ბრიგადა არ გადის გამოძახებაზე”, - წერს გაზეთი “რეზონანსი” სტატიაში, სათაურით რა შემთხვევაში მივა სასწრაფო გამოძახებაზე, თუ პაციენტს ეჭვი კორონავირუსზე აქვს - ახალი რეგულაცია.

“არ მიმაჩნია სწორად, რომ მარტო ტემპერატურით განისაზღვროს პაციენტის მდგომარეობა, რადგან, მაგალითად, თუ აქვს სუნთქვის უკმარისობის ნიშნები სასწრაფო დახმარება დროულად უნდა მივიდეს მასთან და სასწრაფოდ უნდა მოხდეს საავადმყოფოში მისი გადაყვანა. სუნთქვის უკმარისობა უმეტესწილად არ ვითარდება პნევმონიის გარეშე. ამიტომ, ამის უყურადღებოს დატოვება არ შეიძლება და ამასთანავე, მას თუ აქვს რაიმე სახის დამამძიმებელი დაავადება, ამ შემთხვევაშიც საავადმყოფოში უნდა იყოს გადაყვნილი. შესაბამისად, მხოლოდ სიცხე არ წყვეტს რამდენად მძიმედ მიმდინარეობს ვირუსი ადამიანის ორგანიზმში”, - განმარტავს გამოცემის კორესპონდენტთან საუბრისას ირაკლი ხმალაძე.

“ასაკოვან ადამიანს შესაძლოა პნევმონია ჰქონდეს, მაგრამ ისე გარდაიცვალოს, რომ მისმა ტემპერატურამ არ გადააჭარბოს 37.0 გრადუსს. ამიტომ, მაღალი სიცხე ყოველთვის არაა ის კრიტერიუმი, რომლითაც უნდა ვიხელმძღვანელოთ. რა თქმა უნდა, ტემპერატურა უნდა გავითვალისწინოთ, მაგრამ მე, როგორც ექიმს, მთავარ კრიტერიუმად მიმაჩნია სუნთქვის უკმარისობა და არა მაღალი სიცხე. თუ პაციენტს უფიქსირდება ყველა ზემოხსენებული სიმპტომი, გარდა მაღალი ტემპერატურისა და არ გადავიყვანეთ, ეს არის დიდი შეცდომა, რომელიც უამრავ რისკფატქორთანაა დაკავშირებული”, - დასძენს ინფექციონისტი.

თეა გოგოტიშვილი - სიფრთხილის და გონივრულობის გარდა გადარჩენის გზა არ გვაქვს
ქართული პრესის მიმოხილვა 02.12.2020
ვის ჩაუტარდება კლინიკა „ნიუმედში“ Covid 19-ის სწრაფი ტესტირება, მათ შორის ანტიგენზე დაფუძნებული ტესტით და D-დიმერის კვლევა უფასოდ? - ინტერვიუ კლინიკის დირექტორ ნათია ბულაცაშვილთან
კატარის ავიახაზები 15 დეკემბრიდან მე-5 ახალ მიმართულებას ამატებს სან ფრანცისკოს მიმართულებით და კიდევ უფრო აფართოებს ამერიკის შეერთებული შტატების ქსელს
გრიპის საწინააღმდეგო ვაქცინაცია კომპანია “GM Pharma”-ში
ლივომ უძრავი ქონების ყიდვა-გაყიდვის პროცესის გამარტივებისთვის სერვისების 80% გააციფრულა