„ქართული ოცნების“ აღმასრულებელი მდივანი ირაკლი კობახიძე გუშინ, წერეთლის გამზირზე მიკროსაფინანსო ორგანიზაციაზე განხორციელებულ თავდასხმას გამოეხმაურა. როგორც კობახიძემ განმარტა, სამწუხარო ფაქტი მოხდა, თუმცა, მთავარია, რომ დანაშაული აღკვეთილია.
„რაც შეეხება კრიმინალს, ამასთან დაკავშირებით დეტალურ სტატისტიკას და ინფორმაციას ალბათ, შინაგან საქმეთა სამინისტრო წარმოგიდგენთ. ბუნებრივია, ფაქტი არის სამწუხარო და კარგია, რომ დანაშაული აღკვეთილი იქნა“, - განაცხადა კობახიძემ.
ცნობისთვის, წერეთლის გამზირზე მდებარე მიკროსაფინანსო ორგანიზაციაში 31 წლის მამაკაცი შეიჭრა და 17 ადამიანი მძევლად აიყვანა. თავდამსხმელთან სამართალდამცავების მიერ რამდენიმესაათიანი მოლაპარაკებების შედეგად, ბრალდებულმა მძევლად აყვანილი ადამიანები ეტაპობრივად გაათავისუფლა.
მომხდარ ფაქტზე გამოძიება საქართველოს სისხლის სამართლის კოდექსის 144-ე მუხლის მე-2 ნაწილის “გ” ქვეპუნქტით და 236-მუხლის მე-3 და მე-4 ნაწილებით გრძელდება, რაც ორზე მეტი პირის მძევლად ხელში ჩაგდებას და ცეცხლსასროლი იარაღის მართლსაწინააღმდეგო შენახვა-ტარებას გულისხმობს.