სტენფორდის უნივერსიტეტმა მსოფლიოს საუკეთესო მეცნიერთა 2%-ის რანჟირებული სია გამოაქვეყნა, რომელშიც საქართველოდან სულ ხუთი მეცნიერი შევიდა, მათგან სამი ილიაუნელია. ამის შესახებ „ინტერპრესნიუსს“ილიას სახელმწიფო უნივერსიტეტის პრესსამსახურიდან აცნობეს.

მათივე ცნობით, ოზგურ ქიში, ილიას სახელმწიფო უნივერსიტეტის სამოქალაქო ინჟინერიის მიმართულების პროფესორია, რომელიც მსოფლიო რეიტინგში მე-7 ადგილზეა გარემოს დაცვის ინჟინერიაში.

რაინერ ვ. ბუსმანი, ილიას სახელმწიფო უნივერსიტეტში ეთნობოტანიკის კვლევითი ცენტრის თანადამფუძნებელი, გამომცემლობა Springer-ში კავკასიის ეთნობოტანიკის სერიის დამფუძნებელი და გამომცემელია. რაინერ ბუსმანი მსოფლიო რეიტინგში 518-ე ადგილზეა სამკურნალო და ბიომოლეკულური ქიმიის მიმართულებაში.

მერაბ სვანაძე, ილიაუნის მატემატიკის მიმართულების პროფესორია, რომელიც მექანიკური ინჟინერიისა და ტრანსპორტის დარგში მსოფლიოს მასშტაბით 1631-ე ადგილს იკავებს.

„ექსპერტების მიერ მომზადებულ სიაში წარმოდგენილია 22 სამეცნიერო დარგსა და 176 ქვე-დარგში მომუშავე100,000-ზე მეტი მეცნიერი, რომელთა გამოქვეყნებულმა კვლევებმა ხელი შეუწყო შესაბამისი სფეროს წინსვლასა და სხვა მკვლევრების პროდუქტიულობის ამაღლებას.

სტენფორდის რეიტინგი ეყრდნობა Scopus-ის მონაცემებს და აკადემიური საქმიანობის შეფასებისას იყენებს ციტირების შემდეგ კრიტერიუმებს: ჰირშის h-ინდექსი; თანაავტორობის Schreiber hm-ინდექსი; დამოუკიდებლად გამოქვეყნებული ნაშრომების ციტირება და ციტირების ერთიანი ინდექსი.

სრული სიის სანახავად გადადით ბმულზე: https://bit.ly/2Jn0BfZ",-ნათქვამია გავრცელებულ ინფორმაციაში.