სომხეთის ოპოზიცია, რომელიც ქვეყნის პრემიერ-მინისტრის ნიკოლ ფაშინიანის გადადგომის მოთხოვნით საპროტესტო აქციებს რამდენიმე კვირაა მართავს, მინისტრთა კაბინეტის მეთაურის პოსტზე ყოფილი პრემიერ-მინისტრის ვაზგენ მანუკიანის კანდიდატურას უჭერს მხარს. ამის შესახებ ჟურნალისტებს ეროვნული უსაფრთხოების სამსახურის ყოფილმა დირექტორმა, ოპოზიციური პარტია „სამშობლოს“ თავმჯდომარემ არტურ ვანეციანმა განუცხადა.

„ჩვიდმეტმა პარტიამ ფორმატი გააფართოვა და შექმნა „სამშობლოს გადარჩენის საბჭო“, რომელმაც მიიღო გადაწყვეტილება, ვაზგენ მანუკიანის კანდიდატურა პრემიერ-მინისტრის თანამდებობაზე წამოაყენოს“ , - განაცხადა ვანეციანმა.

მან მანუკიანის დიდი პოლიტიკური გამოცდილების შესახებ გაამახვილა ყურადღება.

„მიღებულია გადაწყვეტილება, რომ მანუკიანი შეწყვეტს თავის პარტიულ საქმიანობას. ის ვალდებულებას იღებს, ჩაატაროს რიგგარეშე საპარლამენტო არჩევნები, რომელშიც მონაწილეობას არ მიიღებს“, - განაცხადა ვანეციანმა.