სააკაშვილმა გუბაზ სანიკიძეს დაავალა და პირდაპირ ეთერში დააპირისპირა ნიკა მელიას, რომ რაღაც ზედმეტად „თავში არ ავარდნოდა“ მას, - ამის შესახებ საპარლამენტო უმრავლესობის ლიდერმა ირაკლი კობახიძემ ტელეკომპანია „პალიტრანიუსის“ გადაცემა „360 გრადუსში“ განაცხადა.

როგორც კობახიძემ განმარტა, თუ ვინ იქნება „ერთიანი ნაციონალური მოძრაობის“ თავმჯდომარე, ამას მნიშვნელობა არ აქვს.

„ნაციონალურ მოძრაობაში“ ხელმძღვანელობა არის გამოკვეთილი, პირველი პირი არის სააკაშვილი, მეორე პირი არის გვარამია, დანარჩენი ყველა არის მეორეხარისხოვანი.

თქვენ გახსოვთ, მაგალითად, როცა მელიას რაღაც ამბიციები გაუჩნდა ლიდერობასთან დაკავშირებით არჩევნების შემდეგ, ის იყო აგრესიული პროცესების ლიდერი პირველი რამდენიმე დღის განმავლობაში. სააკაშვილმა გუბაზ სანიკიძეს დაავალა და პირდაპირ ეთერში დააპირისპირა სანიკიძე მელიას, რომ რაღაც ზედმეტად თავში არ ავარდნოდა მას. სააკაშვილი არის პირველი პირი, გვარამია არის მეორე პირი და ბუნებრივია, მათთვის, ვინ იქნება პარტიის თავმჯდომარე, ეს აბსოლუტურად ფორმალური მხარეა, ანუ ეს იქნება აბსოლუტურად ფორმალური ფიგურა პარტიის თავმჯდომარე, თუ რაც ერქმევა. პირველი პირი იქნება სააკაშვილი, მეორე პირი გვარამია და ნუ, ერთმანეთთანაც პატარა კონკურენცია ამ ორ პირს აქვს, მესამე პირი ვინ იქნება და ფორმალურად თავმჯდომარე ვინ იქნება, მეორეხარისხოვანია“, - განაცხადა კობახიძემ.