“ნაციონალური მოძრაობის” პოლიტსაბჭოს სხდომა მიმდინარეობს
"ნაციონალური მოძრაობა“ პოლიტიკური საბჭოს სხდომას მართავს. ინფორმაცია „ინტერპრესნიუსს“ პარტიის პრესსამსახურში დაუდასტურეს.
რა თემებზე მსჯელობენ დღევანდელ შეხვედრაზე დაზუსტებით უცნობია, თუმცა პოლიტსაბჭოს სხდომა სავარაუდოდ, „ნაციონალური მოძრაობის“ ახალი თავმჯდომარის საკითხს უკავშირდება.
ცნობისთვის, გრიგოლ ვაშაძემ პარტია “ნაციონალური მოძრაობა" და მის მიერ დაკავებული ყველა პარტიული თანამდებობა 15 დეკემბერს დატოვა. როგორც მან "ფეისბუქის" გვერდზე დაწერა, არ ეთანხმება პარტიის ხელმძღვანელობის უმრავლესობის მიერ პარტიის წევრებთან კონსულტაციების გარეშე არჩეულ ტაქტიკას.
ვაშაძის თქმით, ის ასევე ვერ შეეგუება იმას, რომ პარტიის გარშემო და მის შიგნითაც გამოჩნდნენ ოდიოზური ფიგურები. გრიგოლ ვაშაძე ასევე აღშფოთებას გამოთქვამს სტრატეგიული მოკავშირეების დიპლომატიური მისიების ხელმძღვანელთა წინააღმდეგ "გაჩაღებული თავდასხმებისა და შეურაცხყოფის კამპანიის" გამო.
