ირაკლი ღარიბაშვილი - დაშავებულ სამხედრო მოსამსახურეებსა და მათ ოჯახის წევრებზე ზრუნვა სახელმწიფოს ვალდებულებაა

თავდაცვის მინისტრობის კანდიდატის ირაკლი ღარიბაშვილის განცხადებით, დაშავებულ სამხედრო მოსამსახურეებსა და მათ ოჯახის წევრებზე ზრუნვა სახელმწიფოს ვალდებულებაა. ამის შესახებ ღარიბაშვილმა პარლამენტში ახალი სამთავრობო პროგრამის თავდაცვის ნაწილის წარდგენის შემდეგ განაცხადა, რითაც დაჭრილ-დაშავებული სამხედრო მოსამსახურეებისათვის თავდაცვის უწყებაში არსებული პროექტების თაობაზე დეპუტატების კითხვებს უპასუხა.

მისი განმარტებით, წელს დაჭრილ-დაშავებულ სამხედრო მოსამსახურეებს 200-დან 800 ლარამდე სახელფასო დანამატი დაენიშნათ.

თავდაცვის მინისტრობის კანდიდატმა ახლად შემუშავებული ტრანზიციის პროგრამა გამოყო, რომელიც გრძელვადიან სამკურნალო შვებულებაში მყოფი სამხედროების აქტიურ სამხედრო სამსახურში დაბრუნებას ან სამოქალაქო ცხოვრებაში გადასვლის მხარდაჭერას ისახავს მიზნად. გარდა ამისა, მომავალი წლიდან რეაბილიტაციისა და ადაპტაციის ახალი პროგრამა დაიწყება.

ირაკლი ღარიბაშვილის განცხადებით, დაშავებული სამხედროებისთვის საჭირო სამედიცინო მომსახურებას თავდაცვის უწყება სრულად უზრუნველყოფს.

თავდაცვის სამინისტროს ცნობით, მინისტრობის კანდიდატმა ამერიკელი პარტნიორების მხარდაჭერით გახსნილი მარო მაყაშვილის სახელობის სარეაბილიტაციო ცენტრის შესახებაც ისაუბრა. მისი განცხადებით, რეგიონში უპრეცედენტო სარეაბილიტაციო ცენტრი დაჭრილი სამხედროების რესოციალიზაციასა და რეაბილიტაციას ხელს შეუწყობს. მინისტრისვე თქმით, ამავე მიზნით, დაშავებული სამხედრო მოსამსახურეები სხვადასხვა სპორტულ ღონისძიებაში მონაწილეობენ. მან მაგალითად დაასახელა წელს ამერიკაში გამართულ სპორტულ შეჯიბრებაში ქართველი დაჭრილი სამხედროების მონაწილეობა და სხვადასხვა სახეობაში მოპოვებული 41 მედალი.

მინისტრობის კანდიდატმა მზადყოფნა გამოთქვა „დაჭრილ მებრძოლთა თანადგომის ფონდთან“ თანამშრომლობის კუთხით. მისი განცხადებით, ქართველ მებრძოლებზე ზრუნვა სოციალური პასუხისმგებლობაა და კერძო და სახელმწიფო სექტორის ნაყოფიერი თანამშრომლობის საუკეთესო მაგალითია.

კახა გოგოლაშვილი - როცა სტაბილიზაციისკენ მიმართული ნებისმიერი კონსტრუქცია ინგრევა, იქ სამოქალაქო დაპირისპირების საფრთხეც არსებობს
ქართული პრესის მიმოხილვა 29.07.2021
ლევან ალაფიშვილი - ოპოზიციამ მიუტევებელი შეცდომა დაუშვა, როცა პლებისციტი თვითმმართველობის არჩევნებზე მიბმულ პროცენტში გაცვალა
რა უპირატესობები აქვს სამსუნგის სმარტფონს ოფიციალური ჰოლოგრამით?
სიახლე PSP-სგან - ფრანგული დერმატოლოგიური კოსმეტიკის ინოვაციური ბრენდი SVR უკვე საქართველოშია
გაყინული კრემიდან „თოლიას“ რეცეპტებამდე, ანუ ყველაფერი, რაც ნაყინის შესახებ უნდა იცოდე